¹ Jisas kli aisan maprika bilara, naku wisata: ² Heben kinka laka ba lika, kin kum ailuhpia maritka dukiara plun piaki lilia tara dauki baku sa. ³ Ai albaia nani blikan wan, upla inbit munan nani bara maisa baha lili ka bara balbia dukiara, kuna inbit munan nani ba balras kan. ⁴ Kin ai albaia wala nani kli blikan wan, bara naku wisata: "Baha nani inbit munan nanira wis: "Plun nani yan ridi daukrisa. Bip ki bul tara, bara sin bul wahma nani ba ikri sa, bara diara nani manas ba pat ridi sa. Man nani bal naha marit ka lili kara." ⁵ Kuna baha nani uplika rait apia luki, baha inbit munan kaba briras kan. Manis ba ai tasbaya ra ai daiura nani main kaikaia wan, wala nani ai sap kara wan wark daukaia. ⁶ Wala nani mita kin albaia nanira alki mawan swira dauki ikan. ⁷ Bamna kin ba lawanra, ai suldaduka nani blikan wan, bara iki tikan upla aikra nani ra, baku sin tawan bila aiska anki tikan. ⁸ Bara kin ba ai albaia nanira win: "Marit ba pat ridi sa, kuna baha nani inbit munan nani ba yamni kaikras kan. ⁹ Baku bamna, man nani yabal luaika nani bara was, bara marit lilika nara man nani sipsma pitka ba kat upla ailalra inbit muns. ¹⁰ Alba nani ba yabal bak wan, bara upla pain an saura nani yabalra bara nani bara asla daukata. Bamna marit asla takaika pliska ba upla uba ailal mita banwan pali kataba. ¹¹ Kuna kin ba upla inbit munan nani ba kaikaia bakan taim, kaikan baha pliskara waitna kum bara kan, marit ra waia kualka dimras kan. ¹² Bara kin ba naku wisata: "Pana, ¿Naha pliskara man marit kualka dimras nahki dimi balram?" Bara waitna ba sip turi aisaras aibila praki sap pali kata. ¹³ Bamna kin ba ai albika nani wisata: "Wilks naha waitnikara mina an mihta sut, bara luks autra tuhmi tara tilara, baha ra napa arkbanka bara sin inanka nani bara ba. ¹⁴ Kan upla ailalba ba winanka brisa, kuna wahbi sakan nani ba lika, nanman pali sa." ¹⁵ Baku bamna, Faridi nani ba wihki aisi kaikan nahki natkara Jisas ba auturka aisi kabia taim alki priskaia dukiara. ¹⁶ Bara Farisi an Herot uplika nani ba aidisaipilka nani blikan. Witin nani ba Jisas ra naku wisata: "Smasmalkra, yan nu bahwisna man rait aisisma, bara sin smalkisma ansaba rait pali Dawan yabalkbaka. Upla dia aisabia ba man kaikras, an sin man upla kum ra tara kulkras, sut ra kumi kaikisma. ¹⁷ Baku bamna, wan wis, ¿dia lukisma? ¿César ra Biuti mana aibapi kaiaba, la ba pitka kat sa ki apia kaka baku kaia apia kaiasa? ¹⁸ Bara Jisas ba nu takan witin nani ra saurka bara kanba, bara naku wisata: "¿Mawan wal kira nani, dia mata nani traiki kaikisma? ¹⁹ Lalah ma kum saki aimadiks". Bamna yua kum mâna win taki lalahka ma kum brisalki madikan. ²⁰ Jisas mita naku win: "¿Nara nina ulbanka an mawan lilka nara na ya dukia sa ki?" ²¹ Witin nani naku aisata:"César dukiasa". Bara Jisas mita wisata: "Bakusa kaka, César dukia ba, César ra yas, an Dawan dukia ba, Dawan ra yas". ²² Baha turka walan taim, aihka pali mayunra yabikata. Baku witin nani swin bara baha pliska wina witin nani taki wasata. ²³ Baha yua ra sadusi nani upla pruan wina kli buan smalkanka ra kasak lukras nani ba Witin ra balan. Witin naku makabi walata, ²⁴ Smasmalkra, Mosis naku wan smalkan: "Waitna kum ai maritka wal luhpa baikras pruia sa kaka, maritka bara muihnika wala mita brin kaiasa, aimuhni luhpia kum baikaia dukiara." ²⁵ Baha ra ai muhni 7 bra kata. Pas tauraba marit takan, bara sin luhpa baikras pruata. ²⁶ Bamna ai muhni wala mihtara swisata aim ritka kataba. Bara sin aimuhni wala kataba sin luhpa baikras pruan, kli muhnika wala kata sin bara muhnika las kata kat. ²⁷ Baha nani sut luan ra mairin kata sin pruan. ²⁸ Nanara pruan nani bubia piuwara, ¿Baha mairin ba, muhni 7 ba wina, ya pali ba maritka kabia ki? Kan muhnika sut ba wal marit takan kan." ²⁹ Jisas mita naku wisata: "Man nani rait pali tanka brirasma, man nani Dawan karnika kaikras an bila ulbankaba laki kaikras. ³⁰ Kan pruan nani bubia piura upla kumi marit takbia apia, an marit laka yabia apia, sa kuna sut ba insal nani baku kabia. ³¹ Pruan nani kli buan tanka ba nakusa, ¿Mas nani aisi kaikras ma ki ulbankara Dawan dukiara maismalkanba, naku wisa: ³² "YAN SIKA EBRAHAM GADKA, AISAK GADKA, BARA SIN JECOB GADKA."? Dawan sika pruan nani Gadka apia, sa kuna upla raya nani Gadkasa." ³³ Upla kuara tara baha nani sut ba walan taim, smalkankaba dukiara aihka pali ai dahra wali kata. ³⁴ Bara Farisi naniba nu takan Jisas mita Sadusi nanira bila prakan win walan taim, witin nani asla takan. ³⁵ Kum tila bara kan, witin ba lika la ulbanka nani ba tanka brabrira kata, witin mita Jisasra traika kaikaia dukiara naku makabi walata: ³⁶ "Smasmalkra ¿ansa pali ba Dawan laka saki?" ³⁷ Jisas mita naku win: "MAN DAWAN KAMRA LATUAN KAIKS KUPIAM AISKA, RAMYAKA AISKA, BARA SIN SINSKAM AISKA". ³⁸ Naha sika la pas taura ba an kau tara ba. ³⁹ La wala kum bara sa, wal ai talyika sa, "UPLIKAM WALA RA LATUAN KAIKS MAN WINAMRA BAKU." ⁴⁰ Prapit nani la ulbanka sut ba, naha laka wan na mita sut ra asla munisa." ⁴¹ Nanara kau Farisi nani ba asla takin kan, Jisas mita makabi walata. ⁴² "¿Día lukisma man nani Jisas krais ba dukiara? ¿Ya luhpia sa ki?" Witin nani wisata: "Devid luhpiasa." ⁴³ 3 Baras Jisas naku wisata: "¿Nahki Devid ba Spirit ra aisi Dawan wisa, ⁴⁴ 44 BARA DAWAN MITA WIN, DAWANRA: "MIHTI AIHKIKARA HIWS, WAIHLAM NANI BA MINAM MUNHTARA IKAMNA KAT? ⁴⁵ Devid mita Jisas krais ra "Dawan" wisa kaka, ¿Devid luhpia nahki kaia sa?" ⁴⁶ Kumi bara apu kata turi kumi wiaia, Jisas makabi walan kara, bara sin kau kumi apu kata Jisasra turi makabi wala.