¹ Bamna Jisas aisan upla kuara tara ra an sin aidisaipilka nani sut ra. ² Naku wisata: "Sadusi an Farisi nani ba Moses iwaika ra iwisa. ³ Baku bamna, dia dukia kra witin nani mita dauks wisa kaka, dauks kuna aman laki kaiks. Kuna witin nani dauki ba, nina bliki daukpara, witin nani ba diara manis aisisa, kuna sip alki daukras. ⁴ Witin nani ba karbanka ailal wilki sa, sip tuilkaia apia nani, kuna upla wala nani pahpaia ra sunisa. Kuna witin nani lika ai mihta snaika kumi nikbras baha tuilkaia dukiara. ⁵ Ai daukanka nani sut ba daukisa, upla nani ba kaikbia dukiara. Witin nani ai klahkla nani buki ai pura sunisa, ai kualka mahta nani yari yus munisa. ⁶ Witin nani piaika pliska ra auya bara, plis pain nani baman plikisa, Sinakuk ra auyabara sin laik sa iwaika pain nai bara iwaia, ⁷ bara si aikaika pliska ra auya bara laiksa upla mita nakso wibia, an laiksa witin nanira upla mita wibia masmalkra. ⁸ Kuna man nani swirka smasmalkra waiwibiara, kan smasmalkra ba kumi man sa, man nani ba muihnisma. ⁹ Tasba ra waitna kumira sin aisa wipara, kan man nani aisam kumi baman brisma, Witin sika heben purara bara ba. ¹⁰ Baku sin "smasmalkra" maiwinbiara, kan man nani smasmalkra kumi baman brisma, Jisas Krais. ¹¹ Kuna man nani tilamra kau tara ba, man nani albaiam kaiasa. ¹² Ansa uplika silp aiwina ra tara wisi yabia kaka, maya kat alahban kabia. Kuna ansa uplika silp ai wina ra mayara alahbia kaka, purara sunan kabia. ¹³ ¡Man nani umpirasma, aiulbra nani an Farisi mawan wal kira nani! Man nani lika hebenheben kinka laka durka ba praksima upla wala nani bribiara dukiara. Man nani silp dimi waras, baku sin uplikam wala nani pat dimi waia lama nani bara sin sip yaram dimi waras. ¹⁴ ¡Man nani umpirasma, aiulbra nani an Farisi mawan wal kira nani! man nani piarka umpira nanira dukia dakbisma yaba. ¹⁵ ¡Alai palisa man nani aiulbra nani an Farisi mawan wal kira nani! Kan man nani impakisma kabuk ki bara sin tasba bak, man nani lamkara kum paski briaia dukiara. Bara man nani lamkara kum brisuma taim, man nani mita trip wal pitka sitan luhpia daukisma, man nani baku. ¹⁶ Man nani umpirasma, man nani nakras kum baku ta brisma, bara man nani naku wisma: "Ansa uplika tempel nina maki pramas takbia kaka, patkas pali sa. Kuna ansa uplika Gul nina maki pramas takbia kaka, aisanka pitka bakat daukan kaiasa." ¹⁷ Man nani sinskas nakras nani, ¿ansa ba kau kulkanka yabisa, Gul ba, apia kaka tempel ba, kan baha lika rait pali klin sa. ¹⁸ Bara kli wisa: "Ansa auplika pulpit nina maki pramas takbia kaka, patkas pali kabia. Kuna ansa uplika tempel kalik ka nina maki pramas takbia kaka, aisanka pitka bakat daukan kaiasa. ¹⁹ Nakras nani, ¿ansa ba kau tarasa, Kalik nani ba apia kaka pulpit ba, kan baha lika lalah tanka ba mita? ²⁰ Baku bamna: ansa uplika pulpit ninara pramas takiba, pramas takisa baha bilara nani bara ba dukiara. ²¹ An ansa uplika tempel ninara pramas takiba, pramas takisa baha ninara an baha bilaraba ninara sin. ²² Bara sin ansa uplika heben ninara pramas takiba, Dawan iwaika ninara pramas takisa an Witin iwiba ninara sin. ²³ ¡Man nani umpirasma, aiulbra an Farisi nani, mawan wal kira nani! man nani lika dus wahia kau silpi ba wina 10 (mata wal sip kam sakisma) kuna diara nanai daukaia Dawan lakara kau tara kulkiba alki daukras: Diara pitka ba kat daukaia, uplikam walara umpira kaikaia, kasak lukaya tanka. ²⁴ ¡Man nani lika nakras baku ta brisma, man nani mita lika uplikam wala ra diara silpi saura kum daukbiara wisma, kuna man nani lika diara kau saura an tara ba daukisma. ²⁵ ¡Man nani umpirasma, aiulbra an Farisi nani, mawan wal kira nani! Kan man nani lika li diaika basu ka an plit naniba taia purak ki baman klin munisma, kuna insaitkam ba lika uba pali implikan laka tara barasa. ²⁶ Man nani Farisi nakras nani, basu kam ba, bara sin plit kamba bila ba pas klin muns, baku lika sip kabia lâta saitkaba sin klin takan kaia. ²⁷ ¡Man nani umpirasma, aiulbra an Farisi nani! Kuna man nani lika sim raiti pihnika bakusma, lâta saitka ba prana kaikisa, kuna insaitka ba lika upla pruan nani dusa an diara taski baman sa. ²⁸ Baku man nanira maiwisni, man nani sim bakusma, lâta saitkaba sin waitna klin baku tukisma waitna nani mawanra, kuna raitka paliba lika, insaitkamba diara taski bara sinskas laka baman sa. ²⁹ ¡Man nani umpirama, aiulbra an Farisi nani, mawan wal kira nani! Man nani prapit nani raitika pakisma an upla pain nani lilka nani paski sasahkisma. ³⁰ Man nani lika naku wisma: 'Yawan nani wan almuka nani taimkara iwi kan kaka, yawan prapit nani talia laikan ba, baha nani tilara apu kaia kan.' ³¹ Baku bamna, man nani silp aisisma, yan nani lika baha nani prapit nanira iki tikan nani ba luhpia. ³² Man nani lika almukan nani saurka dauki taskan kan ba, wans taka wala ba asla munisma. ³³ Piuta kiamka nani, ¿Nahki nakkara man nani swakwi takma kî îl pautara mai lulkaia dukiara lamka daukaiba wina? ³⁴ Baku bamna, kaiks, yan man nanira prapit mai blikisna, waitna sinskira nani. Baha nani manis ra ikan kabia an dus prihni ra saban kabia. bara kli wala nanira sikakuk kam nani bilara ali wipan kabia, an nina bliki tawan kum wina tawan wala kat wan kabia. ³⁵ kaina piuwara, baha nani waitna saurka apu kan talia tasbara laiwuia ba man nani puramra kahuan kabia, bara sin waitna klin Abel talia wina Berekias luhpia Zakarias kat, kan man nani mita ikram tempel watla bila an pulpit kat. ³⁶ Raitpali yan man nanira maiwisni, naha sut na takan kabia man nani piuwamra. ³⁷ ¡Yerusalem, Yerusalem, man nani prapit nani ikismaba, bara sin baha nani man nanira dukiamra balan walpa ni pruki ikismaba! ¡Nahki pitka brinki kan luhpiam nani ba asla daukaia, sin kalila mairin nani ai luhpia silpi nani ai knawa distikara yukuki baku, kuna man nani baha ba brin mai daukras! ³⁸ Kaiks, wampla ba yakan pali takansa. ³⁹ Kuna yan kli aisisna, man nani naha ministka wina klî aikaikma apia, klî wibia kat: 'Yamni pali sa baha Dawan ninara aulaba."