¹ Heben kinka laka ba lika sim waitna tasba dawanka kum titan pali autra taki warman nani pliki saki ai tasbaiara wark yabi baku sa. ² Warkman nani ra nahki yua aiska biliara lalah ma kumi aibapi kaia dukiara aisi kaikan luanra, blikan taki wasata aitasbaiara. ³ Bara tasba dawanka ba kli taki wasata, sim kata baku titan 9 awarkara pitka, bara kaikan warkman wala nani, diara aikaika pliska kumra ban diara daukras nani bara kan. ⁴ Baha nanira naku win: Man nani sin was yan tasbaira, bara yan mai aibapamna mamna pitka ba kat," bara bamna witin nani wih wark takata. ⁵ Bara yua wala tasba dawanka kataba kli taki wan, walal mahka tutni awarka pitka, bara sin kli taki wan, tutni 3 awarka pitka, pas taura daukata babku, warkman nani pliki. ⁶ Bara kli taki wan tutni 5 awarka pitka, bara kaikan manis nit apu baku manas bara kan. Bara naku wisata: "¿Man nani dia dauksma nara yua aiska diara kumi sin daukras?" ⁷ Bara witin nani mita naku wisata: "Kan upla kumi sin yan nanira yark pramaska aidaukras." Bara kli tasba dawanka mita naku wisata: "Man nani sin was yan tasbaira." ⁸ Bara tama alkan yuara, tasba dawanka ba mita, ai warka nani sut ta bri bara win; "Warkman nani bara wins balbia, warka takan mana, lalahka ba yas, upla sut las dimi balan ba wina, bara sin pas taura dimi balan sut." ⁹ Warman nani tutni awarkara wina wark takaia dukiara pramas takan nani sut ba balan, bara kumi banira lalah mâ kumi yaban. ¹⁰ Baku sin balan, pas taura wark takan uplika nani ba sin, witin nani ba lalah kau bribia lukan, kuna witin nanira sin lalah mâ kumi baman yabata. ¹¹ Baha nani ai mana brin luanra, tasbaia dawanka ba wal turban brisata. ¹² Bara naku aisata: "Naha waitna nani na, awar kumi baman wark takan, kuna man mita wal kimi wan kulkisma, yan nani lika lapta muhtara diara wihra pali twilki bauhri." ¹³ Bamna tasbaia dawanka mita baha nani kumra tawi naku wisata: "Painika, yan manra diara saura maimunras. ¹⁴ ¿Man damra walrasmaki lalah ma kumi maikaia dukiara yawan wal aisi kaikataba? Man dukiamba brih kainamra was; yan brinki sa naha warkman ka nani, las ra dimi balan nani ra man nani ra mamna maikri baku yabaiasna kaka. ¹⁵ ¿Yan duki nani ba wal, yan wantsnaba daukaia sip apiasnakî? ¿Apia kaka pain ki ba dukiara ai tumisma ki? ¹⁶ Baku bamna, nina uplika nani ba taura kabia, bara sin taura nani ba nina tauan kabia." ¹⁷ Jisas ba Jerusalem ra uli auya kan yuara, yabal impakikan knaya ra ai aidisaipilka 12 ra asla muni naku wisata: ¹⁸ Kaiks, yawan Jesrusalem ra uli waisa, baha ra waitna luhpika waitnaba sasirduti lal ka bara sin aiulbra nani mihtara mankan kabia. Witin nani mita ikaia dukiara laka daukan kabia ¹⁹ bara sin gentil nani Dawan kakaira apia nani mihtara mankan kabia, lawaska kiki mawan swira pasbia dukiara, baku sin Wipi rau sauhki bara sin dus prihnira sabia dukiara. Kuna witin yu yumpara kli buan kabia. ²⁰ Bamna, Zebedeo maya mairin ailuhpia nani aikuki Jisasra balan. Mairin ba Jisas mawanra ailal makupi diara kumi yabia dukiara makabi walikata. ²¹ Jisas mita makabi walan: "¿Dîa brin maidaukisa?" bara witin mita naku wisata: "Man Kinkam lakara iwi kama piuara, wis luhpi wal na iubia, kum mihtam aihkikara, wala smihkan saitkara." ²² Kuna Jisas mita tawi naku wisata: "Man nani nu apiasma dîa pali makabismaba. ¿Man nani karnika brismaki naha kapka laya, yan pat diaia lamarasnaba?" Witin nani naku aisata: "yan nani karnika brisna." ²³ Witin mita tawi naku wisata: "kasak lukisna dima. Kuna yan mihta aihkikara bara sin mihti smihkara iwaba lika, yan wina apia ba mita sip maikras, sa kuna ansa uplika Aisiki mita ridi daukan nani ba dukiasa." ²⁴ Baku bamna, disaipil 10 nani turkaba walan taim, minitkara turban kumra dimi wan baha aimuhni wal ba mapara. ²⁵ Kuna Jisas mita baha nani ra asla muni naku wisata: "Man nani nusma ki gentil nani gabament ta bri nani ba mai taibi ba, bara sin, witin nani tila wina upla tara nani ba karnika tara brisa witin nani purara. ²⁶ Kuna man nani tilamra baku kaia apia sa, kau yamni sa, man nani tilamra ansa upllika tara kaia lukisa kaka, pas taura witin ba mayara kaiasa, ²⁷ bara sin ansa uplika taura kaia lukisa kaka witin ba alba kaiasa. ²⁸ Bamna Waitna Luhpika waitna ba lika, upla mita witinra kaina plapbia dukiara balras, sa kuna witin ba lika balansa, ai upllika walara hel munaia, bara sin ai rayaka yabaia, baku nani manis swaki sakan laka bribia dukiara. ²⁹ Witin nani Jeriko tasbaia wina taki wan taim, upla kuara tara kum nina blikata. ³⁰ Baku kaikan waitna nakras wal kum yabal upla wapaika knaya bara kan. Bara Jisasba baha bakki auiasâ nu takan, bara ai bila saki kisbi naku win: "¡Dawan, Devid luhpia, yanra umpira ai kaiks!" ³¹ Bara upla kuara tara ba mita wi kan, sap taki bauhs. Kuna witin nani ba, kau ai bila tara saki wi kan: ¡"Dawan, Devid luhpia, yan nani ra umpira wan kaiks!" ³² Bamna Jisas ba takaski witin nanira wini naku wisata: "¿Día daukamna wantsma man nani dukiamra?" ³³ Witin nani mita naku wisata: "Dawan, Yan nani naikra na param takan kabia. ³⁴ Bamna Jisasba, umpira kaikanra, nakra nani ra kanbata. Baha minitkara witin nani ai nakra bri bahwan an Jisas nina blikata.