¹ Baha nani piuwara, disaipil nani ba Jisas ra bal, naku wisata: "¿Ya ba kau tara sa heben kinka lakara?" ² Bara Jisas mita tukta kumi ra winan balan, bara witin nani mawanra madiki naku smalkikata: ³ "Rait pali maiwisni, man nani kupiam laki tukta baku takma kaka, kuna baha apia kaka, heben kinka lakara dimi wama apia. ⁴ Baku bamna, ansa uplika naha tuktika baku ai mayara alauhbia kaka, witin ba heben kinka laka ra kau tara kulkan kabia. ⁵ Bara ansa uplika kum yanra ai bri baku, takta kumra bribia kaka, baha ba rait pali yanra aibrisa. ⁶ Baku sin, ansa uplika kum naha nani yanra kasak luki nani nara, munka tanis takuaia kaka, kau pali painsa baha uplika nandusa ra akbaia walpa tara kumi wilki babu tihu lalmara lulkbia kaka. ⁷ ¡aihka palisa, kan mina prukanka nani ba tasba wina bamna! Alki takaskaia sip apiasa, kan baha nani sut ba balaia sa; ¡kuna kau pali aihka palisa, baha uplika wina mina prukan nani balba! ⁸ Mihtam apia kaka minam mita maikan saura daukisma kaka, dakbi bara man wina laihura luks. Man mampara kau painsa rayakaia lakara piskam kum apua kaia, kau saura sa il pauta lapta, ban kaiara ban ami pliskara winam aisa ami kaia ba. ⁹ Namkra ba mita minan prukisa sa kaka, alki saki man wina laihura luks. Man mampara kau painsa raya kaia lakara namkra kumi wal dimi waia, kau saura sa, il pauta ban kaiara ban ami bara namkra wal sut ami kaia. ¹⁰ Aman kaiks, yan silpiki nani bara ban Knayara lakbiara. Kan yan mita lika maiwisni, insal nani ba ban kaiara Aisiki hebenra bara ba mawan kaikisa. ¹¹ Kuna waitna Luhpika Waitna ba lika tiwan nani kata ba swuaki sakan laka yabaia balan. ¹² ¿Nahki pali kabia? Waitna kum ship 100 brisa, tila ba wina kum tiwbia, ¿99 kata ba swisisi kum tiwan kata ba pliki wisapia? ¹³ Bara witin tiwan kum kata ba sakuya bara, rait pali mawisna witin 99 tiwras bri ba wina, kum tiwan kataba dukiara kau lilia takisa. ¹⁴ Baku natkara maiwisni, Aisam heben purara bara ba kupia laka apia sa, naha silpika nani kumi tiwbia. ¹⁵ Muihkam kum man mampara saura yabia kaka, was lamara, yas ai patkaba laki kaikbia. witin mai walbia kaka, rait pali muihkamba win takramsa. ¹⁶ Kuna mai walras sa kaka, upla 1 apia kaka 2 taki asla taki was, baku lika upla wal an yumpa bila wina walbia, baku sip kabia aisan ka sut ba laki kaikan kabia. ¹⁷ Kuna witin baha nani sut bila walras sa kaka, pat kaba shats mawanra brihwas. Bara sin shats mawanra ai patka ba laki kaikras sa kaka, baha uplika ba man nani tilamra sim gentil apia kaka biutimana brabrira kum baku briram kabia. ¹⁸ Rait pali maiwisni, dia dukia kra tasbara wilkma kaka, heben purara sin wilkram kabia. Bara dia dukia kum tasbara lankram sa kaka, heben purara sin lankram kabia. ¹⁹ Bara sin kau mai wisni, man nani tilam wina wal kum kupia kumi lakara naha tasbara diara kum daukaia dukiara diara kum aimakabia kaka, sut ba Aisiki hebenra baraba mita yaka takan kabia. ²⁰ Baku bana, ansa pliskara yan dukira upla wal apia yumpa asla takisa kaka, yan witin nani mitilka barasna." ²¹ Baha luanra Pita Jisasra bara naku wisata: "Dawan, ¿Yan maipara muihki kum saura yabuya bara, nahki pitka saurka swih tikaiasna? ¿7 pitkasa ki?". ²² Jisas mita naku wisata: "Yan mita lika 7 pitka mai wiras, sa kuna 70 bara sin purara 7 pitka. ²³ Nanara maiwisni, Heben kinka laka ba lika sim kin kumi ai albika nani wina ai tras ka wahbi baku kabia. ²⁴ Bara maka ta krikan piuwara, alba kumi bara kan witinra lalah yabaia brikan, talent ma 10,000 bri balan. ²⁵ Kuna witin ai tras kaba aibapaia natka kumi apukan, bara dawanka mita naku wisata, man winan tara an maritkam sin, luhpiam nani aiska, dukiam nani sut brismaba ats wabia, bara baku traski ba aibaps. ²⁶ Baku bamna, alba kata ba tasba kat kahuan, ai dawanka mawanra ailal makupi naku wisata: "Ura bili aiwaks yan dukira, bamna yan mai aibapamna". ²⁷ Bara dawanka ba mita umpira kaikan, baku natkara patin munan an traska nani sut ba swih tikata. ²⁸ Bara baha alba kataba, witin ai albaia kum witinra lalah 100 denario yabaia bri katara wan. Bara ai albaia ra alki nandusa taibi naku wisata: "Lalah kun aikaiasmaba maka aik." ²⁹ Bara alba kataba tasbara kahui aimamhna lulki naku wisata: "Ura bili aiwaks, bara yan traski sut ba maikamna." ³⁰ Bara pas ta alba kataba ai traskaba aibapaia apia win, kuna witin mita lika, alba wala tras yabaia bri katara, silak watlara brisi mankan, baku natkara ai traska nani sut ba briaia dukiara. ³¹ Baha nani sut takata, alba wala nani ba kaikan, bara sin sari pali kaikan; witin nani ai dawankara wan bara sin diara nani manis takataba maisa pakan. ³² Baku bamna, dawanka mita albara winan balan, bara naku wisata: "Alba saura kira, maiwanra mamhna lulki karam, ba mita yan traskam nani sut ba yan patin maimunri. ³³ ¿Yan mita umpira maikaikri baku, man sin apia albaiam walara umpira kaikaia karamba?" ³⁴ Bara Dawankaba witin mapara rait pali lawan tara brin, bamna waitna saura nani uplara panis muni nani mihtara mankan, baku witin ai traska nani sut ba aibapbia dukiara. ³⁵ Baku, Yan aisiki sin manan dukiamra daukan kabia, kupiam aiskani muihkam walara patka nani sut ba swih tikrasma kaka.