¹ Nda mapac imeaats, Israel, atnej apac omeajtsüw alinoic nipilan. Cos icona lametsojon lamecueatiün, lamewüniün wüx imeajtsan MiDiosan. Icona xeowüy indiüman mengüyiün mitomiün najüyjüy najtaj tiül püjchiün niüng apiürüch. ² Nganüy aag a iüt niüng apiürüch ngome apmawiül icon; at aag a nangan namonts yow lango apmejiüran. ³ Nejiw langome apndom macüliw tiül miíüt Teat Dios; ngome apmajlüy matnej, Efraín apmandilil andüy Egipto at noic nüt nejiw apmüetiw ngo majneaj nüeteran tiül cambaj Asiria. ⁴ Nejiw langome apmatongoj vino aag ayaj nichech teombás Teat Dios, at miün nejiw lango apmandiüm majaw nejiw Teat Dios. Ajcüwa nichech apmayacüw apmarang atnej nüteran wüx teajiüntsaran wüx andeow nipilan: meáwan leaw apmüetiw apmayac nisoet wüx ombasüw nejiw. Nüeteran apmarang ocueajiw nejiw miün; ngome apmajmel aniüng Teat Dios. ⁵ ¿Cuane apmerangan icona wüx aag a nüt larriüdaran majlüy nangosnüt, wüx aag a nüt netam majlüy minangosnüt Teat Dios? ⁶ Nganüy, ijawan, jondot nejiw mawüw wüx andeowüw, Egipto ampasap nejiw, at a Menfis apmamiüt nejiw. Aag a xem apmaneay nelitlit mitomiün nej nenüt plata at a patiür apmatang aniüng apmapal quiaj. ⁷ Laliüc matüch ajcüwa nüt wüx apmamongochiw xeyay naél; laliüc mapeay ajcüwa nüt wüx netam mangüyiw. Iich majawüw meáwan Israel meáwan ajcüwa anderac cam. Nechach nendeac mipoch Teat Dios at landroj nexeom omeaats naxey, wüx arang nadamüy ngo majneaj at wüx xeyay ajcüy omeaats. ⁸ Nendeac mipoch Teat Dios nej nejiür ayac Teat Dios majiür Efraín. Nipilan ayacüw isapayej nguiajantanej nguiane apmamong. ⁹ Nejiw nomiün landrojow atnej wüx minütiw Guibeá. Teat Dios apmawün majaraw alinomb ngo majneaj arangüw at Nej apmayac nejiw tiül naél mangüyiw asoetiw nejiw. ¹⁰ Teat Dios apiüng: "Wüx Xique tanaxeom Israel, atnej naxeom nangan uvas tiül nawaag wajchiüc. Atnej najneajay aong xiül wüx nüt aong mixiül toc, Xique tanaxeom miteatiw nejiw. Nganüy nejiw tambüw nguiane ajlüy Baal Peor at nejiw tarangüw minajiüt aag a narangüch dios quiaj neyac monxing. Nejiw tajlüyiw atnej najüyjüy nipilan lajmboc ombasüw at nejiw aag a narangüch dios leaw nejiw andiümüw. ¹¹ Nganüy wüx Efraín, meáwan leaw najneaj tajiürüw apndrom atnej ajlül noic quiec. Langome apmajlüy wijquiaw namix nine, nejinguind montaj apmajiür micual nej at ngome apndom majmel micual nej. ¹² Masey nejiw taquijpüw miün namix nine, Xique sanaquiiüb mamb atquiaj nejinguind ngome apmacüliw. ¡Ay wüx nejiw wüx Xique sanacueat nejiw! ¹³ Xique lanajaw Efraín, ajlüy atnej Tiro, alpiüram wüx noic najneajay iüt, nganüy Efraín apmaquiüjpüw micualüw nejiw andüy teowix aljane leaw apmambiy nejiw." Ijchaw, TEAT-- ¿cuane apmeajchiw? ¹⁴ Ijchaw nejiw montaj majmiüc teomeajtsüw nejiw micualüw nejiw at mijiweaw nejiw ngo majiür aonts nej. ¹⁵ "Wüx meáwan ngo majneaj arangüw tiül Gilgal, quiaj nguiane Xique samelich sajcüy najawüw. Wüx xeyay ngo majneaj arangüw, Xique sanawüniw quiaj Saniüng. Xique langome sanandiümüw; mimonajiütüw nejiw nemejchiw. ¹⁶ Efraín nej noic monandeow nej at mioxiich nej landoj lawaag; nejiw lanngo majiürüw aong nejiw. Masey jondot tajiürüw micualüw nejiw, Xique sanayac micualüw nejiw leaw xeyay andiümüw ndom mandeowüw." ¹⁷ XeDios langome apmangoch nejiw cos nejiw ngo marangüw atnej Nej apiüng. Nejiw apmajlüyiw atnej najüy miün nipilan ngo majiürüw aniüngüw atquiaj apmajaraw tiül meáwan nadamdam cambaj.