¹ "¡Iyac noic ind wüx imbeay! Atnej noic minaj quiec apmajmiüc neyac naél aniüng Teat Dios cos cambaj lamatsoj nembeat anderac at lamaxaing owix majcüy majaw Nembeat Xepoch. ² Nejiw apajüw Xenüt: 'XeDios, xicona quiaj niüng ajlüy Israel sayajcan imbás.' ³ Nganüy Israel lamacueat leaw najneaj , at najcüy majaw nej apmapeax acuiür nejiw. ⁴ Nejiw lamayacüw natangüy monajiüt, ngo marangüw wüx Xenüt. Nejiw lamüjchiw majlüy monajiüt, ngo masajüw Xic leaw apmarangüw. Naag nelitlit cang nenüt plata maquiiüb oro tarangüw narangüch dios ocuejiw nejiw, aag ayaj teamayac nejiw andüy wüx apndrom ombasüw." ⁵ "Samaria, lango mayarich nine miwacüx. Laátitit aag a xeyay sajcüy wüx ombasüw nipilan quiaj. ¿Cas nüt apmacüliw wüx asoetiw nejiw? ⁶ Aag a narangüch dios quiaj tapeay imiün Israel; nop nerang najiüt tarang; ¡ngome Dios nej! Aag a nine miwacüx Samaria apmaqueleteran nequirquiriw. ⁷ Aag a cambaj cam tapiür iünd ndoj taxaing nadamüy xeeh iünd. Ajcüwa misoex trigo ngo majiür osaab nej, ngo ndom marang harina. Jondot matang majiür aong nej, nipilan namong miün apmambichaw. ⁸ Landoj laátsaramb Israel; nganüy aliw tiül xeyay cambaj niüng ajaraw atnej lango membeat nicuajind. ⁹ Nganüy nejiw tambüw matüchiw Siria atnej nop chicac naw tipeat, nej miün quiaj ajlüy. Efraín lamangal monxey maquiiüb. ¹⁰ Masey nejiw lamangalüw monxey tiül palpalwüx nadam cambaj, Xique nganüy sanacanchich majlüyiw noic miün. Imiün wüx apal nejiw minatangüy nenajiüt at ajcüwa mimonajiütüw palwüx cambaj nejiw apmamelich ümbiw. ¹¹ Nganüy Efraín lamüüch mexiyay artül nguiane ayacüch nichech ocueaj nisoet, nganüy andüy wüx, nejiw lamarangüw marang artül niüng arangüch nisoet. ¹² Xique alndom narang wüx nawiig Nembeat Xepoch gajpowüw mil ajlüy, naleaing nejiw apmajawüw atnej alcuane leaw ngo meaag majawüw. ¹³ Andüy wüx ajcüwa nichech leaw apmayacüch, nejiw ayacüw onij at ndoj apmatsambüw, nganüy Xique, Teat Dios, ngome sanasap. Nganüy xique sanayac ximeaats wüx ngo majneaj arangüw at ndoj sanayacüw tiül naél wüx asoetiw nejiw. Nejiw apmandillileaw andüyiw Egipto. ¹⁴ Israel lango leamb omeaats Xic, xique Nerangás nej, at nejiw tarangüw nadamüy najneaj iüm. Judá lamayac nadamüy otüing micoet nej xeyay cambaj, nganüy Xique sanüüch mamb biüm andüy wüx micambajüw nejiw; apmandrooch ombás nadamüy otüing coet.