¹ Wüx Xique tandiümás nandendiich minecoy Israel, minesoet Efraín tejüiquichay, atanej xeyay ngo majneaj tarangüw Samaria, cos nejiw andeacüw monwaiích; nop need ajmel, at noic ajlüy nesapüy moneed anejtiw titiiüd. ² Nejiw ngo mapeay teomalüw nejiw Xique leaw ximeaats meáwan ngo majneaj arangüw. Nganüy lamayey nejiw tiüt leaw tarangüw; ajcüwa ayaj alnengüy teanajaw. ³ Tüjchiw mapac omeaats natangüy nenajiüt naag xeyay ngo majneaj arangüw, at wüx awaíjchaw aquiüjpüw tiül mimonajiüt kambaj. ⁴ Meáwan nejiw nejiürüw najtaj, atnej pow lamüüch merrar nerang peats castil, jane lamüüch maxood atitit mibiüm ajtsaj teamacül maxip. ⁵ Wüx minangosnüt natangüy nenajiüt, ajcüwa mimonajiüt nejiw xeyay tangüniw maquiüjpüw tanganeowüw namonts yow nomiün ngo ndom witiümoj. Néj tapal teombás ajcüwa nipilan monyac naél. ⁶ Cos omeajtsüw nejiw teatitit atnej noic pow, nejiw ayambüw omeajtsüw nguineay mawaiíjchaw. Pal ongwiiüts najneaj omeajtsüw, ümb miün arraw latitit alinomb atnej nadamüy biüm. ⁷ Meáwan nejiw andaab omeajtsüw atnej noic pow, at atsambüw mimonajiütüw nejiw leaw teamajaw nejiw. Meáwan Minatang Mimonajiütüw nejiw lajmiücüw; nejinguind tiül nejiw ngo mayamb Xic. ⁸ Efraín laólüy tiül palwüx cambaj. Efraín atnej nandaab peats leaw lajmiüc tipow. ⁹ Nipilan napeay miün teamambichaw apac, nej ngo majaw cuane teajlüy. Lamajiür ngwial tiül miondeats nej, leaw arang nej ngo maxeom omeaats. ¹⁰ Leaw nejiw tandeacüw tarangüw wüx nadam nejiw nganüy andeac mayac asoetiw nejiw; nganüy nejiw, ngo mandiümüw mandilileaw mayambüw Teat Dios miDiosüw nejiw, ngome teamayambüw, masey wüx leaw nganüy teamamongochiw. ¹¹ Efraín atnej noic palom, nechach at ngo majiür axeom omeaats, teapaj napac onic tiül Egipto, at ndoj lacuiür andüy Asiria. ¹² Wüx nejiw apmambüw, Xique sanateaaig xendoc wüx ombasüw nejiw, Xique sanaloxiw tiüt at nejiw quiec najlüyiw cawüx. Xique sanayacüw tiül naél noic miün meáwanoj. ¹³ ¡Ay wüx nejiw! Cos nejiw lamacuetaiw Xic. ¡Nejiw lamaxainguiw owixaw nejiw wüx ximbás! Xique alndom nawün wüx nejiw, nganüy nejiw andeacüw awaijchaw wüx Ximbás. ¹⁴ Nejiw ngo müjchiw nomiün omeajtsüw wüx mapajüw Xenüt , nganüy nejiw xeyay ajiüntsüw wüx mimatsüw nejiw. Nejiw canchiüjow cos andiümüw jayats osaab trigo at namonts yow, at nejiw antsojliw opechiw nejiw müjchiw xic. ¹⁵ Masey Xique tanaquiaach nejiw at tanüjchiw majiür apac omeaats owixaw, nejiw nganüy teamayambüw omeajtsüw wüx xeyay ngo majneaj marangüw wüx Xembás. ¹⁶ Nejiw ambüw ndoj iünüw, naleaing lango mandilileaw majawüw Xic, atnej majawüw Nejay Minatangüy. Nejiw atnej nejiw noic nejengueay lalojcontsoj. Mimonajiütüw nejiw apmajmiücüw pajcamoj tiüt cos lamong wüx andeacndeacüw. Áag ayaj apmandilil wüx ombasüw nejiw matsojow nejiw tiül cambaj Egipto.