¹ ¡Miteaats, inguiayiün agüy! ¡Aniüng Israel, inguiayiün anderac! ¡Aniüng natangüy nenajiüt, inguiayiün! Cos Teat Dios apmayac icon tiül naél wüx isoetiün. Icona iyacan tiül naél Mizpa at ipalan tiül ndoc wüx ombás Tabor. ² Ajcüwa nipilan xeyay ngo manguiayiw lajmeliw tiül xeyay monbiy nipilan, nganüy xique sanayacüw tiül napat naél meáwanoj nejiw. ³ Xique sayaag ombás Efraín, at Israel ngome almexeotüy Salnaquiiüb nengüy. Efraín, nganüy landoj lamerang atnej nop najüyjüy najtaj; Israel landoj lamatsopoch ombás nej. ⁴ Lango ndom mandilileaw majawüw Teat Dios apal nejiw ngo majneaj arangüw, cos altiül omalüw nejiw ajiürüw montaj, at nejiw ngo majawüw jane nej Teat Dios. ⁵ Adam omeaats Israel lamayac nej tiül ngo majneaj; atquiaj Israel maquiiüb Efraín apmajtochiw apmajmiücüw wüx asoetiw; at miün Judá apmajtochiw maquiüjpüw. ⁶ Nejiw apmambüw maquiüjpüw miwacüx at misapüw nejiw mayambüw Teat Dios, nganüy ngome apmaxeomüw, cos Nej lango majlüy quiaj lamacueat nejiw. ⁷ Nejiw ngo mayacüw omeajtsüw wüx Teat Dios, cos ajiürüw micualüw nejiw maquiüjpüw palwüx montaj. Nganüy wüx minangosnüt jayats kaaw tiül apmambich nejiw maquiiüb omeaats miítüw nejiw. ⁸ Tiül Gibea itsündiün napac nenot anderac manguiayaran, at netsüen soen tiül Ramá. Monyajyaj tiül monstoj tajiünts tiül Bet Avén: ¡Xicona sanandüjpiün ic Benjamín! ⁹ Efraín apmendrojchay ombás wüx nüt ayacaran asoeteran. Tiül noic noic micambaj Israel Xique landoj lanapiüng leaw marrey naleaing apmajlüy. ¹⁰ Montangtang monajiüt ocueaj Judá atnej ajcüwa nipilan leaw andiümüw mapalpalüw miün iüt majal tiüt miíütüw nejiw. Xique sanatong tiüt wüx ombasüw nejiw atnej yow leaw Xeyay Sajcüy. ¹¹ Efraín landoj altiüt; lamapal nej tiüt minesoet nej, cos nejay tandiüm majüy andüy niüng ajlüyiw narangüch dioses. ¹² Xique sanajlüy atnej ndeoog wüx Efraín, at atnej leaw pandiün wüx aniüng Judá. ¹³ Wüx Efraín tajaw mimonandeow nej at Judá tajaw minecoy nej, quiaj Efraín tamb Asiria at Judá tüüch mamb mondeac andeac nej teombas natangüy nenajiüt. Nganüy nej ngo ndom ombás mawün monandeow tengwüy mawün necoy wüx imbasan. ¹⁴ Xique sanajlüy atnej minaj lüw wüx Efraín, at atnej minaliw minaj lüw wüx aniüng Judá. Xique, atan miün quiaj, sanandrooch ombás ndoj Sanaw quiaj sanamb andüy minquiaj, at ngome apmajlüy nejinguind ndom mawün nejiw. ¹⁵ Xique sanamb ndoj sanandilil andüy Niüng Sajlüy, sanacül wüx nejiw apmajawüw ngo majneaj arangüw atquiaj mayambüw Ximbas alinomb, wüx nejiw apmayambüw xic tiül xeyay amix omeajtsüw.