¹ Inguiayiün andeac Teat Dios, icona, micambaj Israel. Nej Teat Dios apmayac isoetiün wüx imbasan, meáwan moncül wüx iüt cam, cos ngo majlüy naleaing wüx anderac tengwüy najneaj poch, ngo mayacaran omeaatsaran wüx Teat Dios nengüy wüx iüt cam. ² Ajlüy xeyay ngo majneaj, monwaiícheran, monbiy nipilan, aneederan at monjiür monxey monjiür montaj. Landroj a cambaj laáw tiül najneaj, at monbiy nipilan andüübndüjpeay miün. ³ Wüx aag ayaj teawaag a iüt, at meáwan leaw acüliw wüx iüt cam tenguial andeowüw lop; ajcüwa nimal tiwajchiüc at ajcüwa quiec tiül mbas acats, at miün ajcüwa cüet tindec, tenguial andeowüw. ⁴ Nganüy nejinguind nde meajchiün macajmiün mayac asoet alinop; nejinguind nde meajchiün mayac asoeteran wüx ombás aljane. Marrey icona, ajcüwa miteaats, jane Xique sayac isoetiün. ⁵ Icona miteaats wüx nüt ngome apmerangan leaw sasaj icon; icona mondeac mipoch Teat Dios ongwiiüts at miün ngome apmerangan leaw sasaj icon, atquiaj Xique sanandrooch ombás Israel leaw ajlüy atnej mimüm. ⁶ Tenguial ndroj ombás Xecambaj cos ngo mandüy andüyeran. Cos icona, miteaats, lango mendiüman mendüyiün andüyeran, Xique at miün langome sanandiüm najaw icon merangan xemeteaats. Cos icona lango leaam imeajtsan nembeat xepoch, masey Xique MiDios, Xique at miün sanawün wüx xemeaats micualan. ⁷ Wüx teaxeyayiw a miteaats, xeyay nisoet teamarangüw wüx Xembás. Nejiw tangowüjchiw atajmüjchiw Xenüt andüy wüx ombás narangüch dios. ⁸ Nejiw teaüetiw wüx minesoet xecambaj; nejiw andiümndiümayej wüx ngo majneaj alteomeajtsüw nejiw. ⁹ Andüy wüx cambaj atan miün quiaj apmamongochiw andüy wüx miteaats; Xique sanayac mamongochiw naél wüx leaw arangüw; Xique sanüüch mandilil andüy wüx ombasüw nejiw atnej arangüw. ¹⁰ Nejiw apmüetiw ngome apaxiüm üetiw; nejiw apmajiürüw najtaj ngome apmajiürüw micualüw nejiw, cos minquiaj ajlüyiw lamacueatiw Teat Dios. ¹¹ Nejiw andiümüw majiürjiürüw miün montaj, mangüniw, at jayats nangaag yow, leaw lamüüch ndrom omeajtsüw. ¹² Xecambaj amb matün manguiay narangüch dios leaw ajiür, at ajcüwa nangoraad andeac masaj nejiw leaw apmarangüw. Cos xeyay ngo majneaj omalüw nejiw leaw teamaquiiüb nejiw, at nejiw arangüw atnej arang najüyjüy najtaj ngo mind mandüjpiw Teat Dios. ¹³ Nejiw ayacüw ichechiw wüx omal tiüc at ambeliw pom quiaj cawüx, teoleajiw op, ajcüwa álamos at terebintos, cos ayacüw najneaj nden. At miün, micualüw monüx ameayiw maquiüjpüw monxey, at miün napewaran ajiürüw monxey. ¹⁴ Xique ngome sanayac naél wüx ombasüw micual monüx wüx apmajiürüw monxey, at miün wüx napewaran, wüx apmajiürüw monxey. Atan miün quiaj ajcüwa monxey ayambüw montaj majiürüw, at miün nejiw ayacüw ichechiw atquiaj ndom mameayiw maquiüjpüw najüyjüy najtaj nerang minajiüt dioses. Nganüy naleaing, aag a cambaj cam, leaw ngo mayar anderac apndrom ombás. ¹⁵ Masey ique, Israel, landoj lamejiür montaj, nde meaach majmiüc majiür asoet a Judá. Icona, nde meriümban Gilgal; nde meriümban Bet Avén, at nde meyacan mipochiün mendeacan: "Atnej Teat Dios almapac". ¹⁶ Cos Israel arang xeyay adam omeaats, atnej arang adam omeaats naliw wacüx. ¿Nguineay Teat Dios alndom maquiiüb nejiw müetiw tiül püjchiün nguiane ajlüy najneaj soex? ¹⁷ Efraín taquiiüb nejiw tiül maquiiüb narangüch dios; icueatiün macül nej miün quiaj. ¹⁸ Masey wüx lamong xeyay angüniw, nejiw teamajiürüw montaj; montantang monajiüt andiümüw majawüw monxing. ¹⁹ Aag a iünd apmayey nejiw tiüt naag owix nej; nejiw apmamongochiw xeyay monxing wüx ayacüw ichechiw narangüch dios.