Gajpow ijquiaw nembaag

1 Efraín teaüet tiül iünd at andüüb mamb iünd naw nonüt. Nej andüübndüjpeay miün teamayac wüx awaiích at ambiy nipilan. Nejiw ayacüw nembeat andeacüw maquiiüb Asiria at ajoyiw minaow olivo müjchiw Egipto. 2 Nej TEAT DIOS lamayac osoetiw nejiw wüx ombas Judá at apmayac mangüyiw asoetiw a Jacob wüx leaw nej arang; Nej apmangüy leaw ngo majneaj arang. 3 Teomeaats mimüm nej Jacob tasap nic oleaj micoj nej, at wüx minüt arang naxey tatsoj maquiiüb Teat Dios. 4 Nej tasojanaag maquiiüb nop ángel at tajntsop wüx. Nej tajiünts at tatün ocueaj Xeyay Mambeol nej. Nej tayaag ombas Teat Dios tiül Betel; quiaj Teat Dios tendeac majaw nej. 5 Nejay nej TEAT DIOS, Nej Teat Dios neneay nipilan montsoj; "TEAT DIOS" aag ayaj Minüt nej leaw netam mapajaran. 6 Atquiaj indililean meyamban MiDiosan. Ersapayon wüx napac tiül nembeat anderac at wüx mimonajneaj nej, at icüliün ndeam wüx minüt MiDiosan. 7 Ajcüwa monüjpeay ajiürüw teowixaw nejiw nepeaxeay leaw ngo mapeax palan; nejiw andiümüw manejtiw. 8 Efraín tapiüng: "Xique naleaing lanajiür xeyay tomiün; xique lanaxeom xeyay tomiün aag ayaj saneay. Wüx meáwan xenajiüt nejiw ngome apmaxeomüw ngo majneaj wüx xic, nicuajind leaw alndom marang nisoet." 9 "Marrey Xique nejay TEAT DIOS miDiosüw nejiw imiün tiül miíüt Egipto saquijpüw mamb. Xique sanüüch mamb macüliw linomb tiül minden jael, atnej wüx nüt landoj lamatiiberan majlüy nangox nüt. 10 Xique tandeacás nasajüw mondeac andeac Teat Dios, at tanüjchiw majawüw aümayej andüy wüx icona. Tanendeac nasaj icona amb wüx ombeay nendeacüw andeac Teat Dios Xique süjchiw mandeacüw naag najneaj anderac." 11 Jondot ajlüy xeyay ngo majneaj tiül Galaad, naleaing ajcüwa cambaj quiaj ngo majiürüw nicuajind ombeatiw. Tiül Gilgal nejiw ambiyaw wacüx mayacüw ichechiw; mi artül nejiw apmarang atnej noic sonongoj cang laümb rapapam tiül nachiütaran iüt. 12 Jacob tecuiür andüy tiül miíüt Aram; Israel tarang najiüt atquiaj ndom majiür mintaj nej; at nej tajiür noic ajlüy sap atquiaj ndom majiür nop mintaj nej. 13 Nej TEAT DIOS lamawün Israel maw tiül Egipto tawün nej nendead andeac mipoch Teat Dios, at nendeac andeac mipoch Teat Dios Nej tajiür nejiw taquiiüb nejiw. 14 Efraín tüüch mamix omeaats xeyay TEAT DIOS. Atquiaj nej TEAT DIOS apmayac wüx omal nej quiej at apmandilil andüy wüx ombas nej xeyay ngo majneaj.