¹ Quiaj ndoj teat natang nenajiüt maquiiüb Amán tambüw tiül aag a nadam monet maquiejpüw müm natang nenajiüt Ester. ² Aag amb ijbüw nüt, wüx miün tengüial matembiw aag a vin, teat natang nenajiüt tasaj Ester: "¿Cuane indiüm metün, müm natang nenajiüt Ester? Sanüüch ic leaw apmetün. ¿Cuane apmetün? Alndom nüüch ic pinawan meawan leawa sajiür." ³ Quiaj a müm natang nenajiüt Ester tasaj nej: "Sitiül lanaxom monajneaj wüx imbas, at ndot mendiüm, meaach xic napac- aag a agüy sandiüm natün, at miün satün meaach xe cambaj. ⁴ Cos lamanüjpiw xicon, xique naquiejpüw xecambaj, nomban andiümüw mandrojchiw ximbasan. Ndot aag miün lasanüübaranan narangan mos, atnej monxey at montaj mos, xique ngome sanendeac, nicuajin nael ngome apmajlüy atnej nganüy, müüch majcüy teat natang nenajiüt." ⁵ Quiaj a teat natang nenajiüt Asuero tasaj a Ester, aag a müm natang nenajiüt: "¿Jane nej? ¿Nguiane apmaxoram a naxey leaw lamayac tiül omeaats nej aag a ngomajneaj quiaj?" ⁶ Ester tandeac: "Aag a naxey quiaj, aag xeyay ajcüy majaw xicon, aag a nemech Aman quiaj!" Quiaj Aman nomban mbayaw cos almaquiiüb teat natang nenajiüt at a müm natang nenajiüt. ⁷ Aag natang nenajiüt, tajcüy, witiet nieng alchetem tengüial anganeowüw vin tiül aag a nadam monet quiaj, ndoj taw quiaj andüy tiül aag a netsüyay ombas ajiür aag a nadam iüm nganüy Aman tacül miün masajsaj a müm natang nenajiüt Ester müüch nej mapac. Nej tajaw aag a nadam nael leaw apmajlüy aag ayaj andüy wüx ombas nej. ⁸ Quiaj a teat natang nenajiüt tandilil imiün tiül aag a netsüyay ombas leaw ajiür aag a nadam iüm andüy nieng tenguial anganeowüw vin. Aman les tajmiec wüx aag a ban nieng alchetem. Teat natang nenajiüt tandeac: "¿Nej apmasap a müm natang nenajiüt niüng sajlüye, niüng saniünga?" Wüx miün tengüial aw teombeay nej aag a poch quiaj ajcüw a monrang mi najiüt teat natang nenajiüt tapojchiw teombas Amán. ⁹ Quiaj Harbona, nop tiül nerang mi najiüt teat natang nenajiüt, tandeac: "Nots nerrondüy oniqueran apmajal oleaj icmiow gajpawüw minguüxeran teawitiw quiaj miün niüng ajlüy aniüng Amán. Nej tawitich niüng apmamb Mardoqueo, aag a leaw tandeac apmajiür teat natang nenajiüt." Teat natang nenajiüt tandeac: "Irrondan wüx." ¹⁰ Quiaj tambüw marrondüw wüx aag a nerrondüy oniqueran leawa landoj lamarang niüng apmamb Mardoqueo. Quiaj tapateay ajcüy teat natang nenajiüt.