¹ O laa si Naomi, manuangna i ti’i, lumila’ wia nisia: “Oki’ku, sapa ku’a re’en e reiy’la sile’osna sa aku sumero tampa paterungan i wee nikoo rio koo ma’aruiy? ² Takar en teakan, e reiy’ ku’a re’en si Boas, se mepa’aya-pa’ayang–mepa’aya-pa’ayangna wewene se kina’-ampitmu mola i ti’i, nyi’a mouw se kawanua ta? Nisia wia em bengi i yi’i si meteta’ap en jelai waki tampa pasirian; ³ takar lumele’ mouw, wo misu’ mouw, pakenouw e labung wangunnu wo mea mouw waki tampa pasirian i ti’i. Ta’an te’a mouw koo kakete’uan wia se tou i ti’i, nu reiy’pe’ nisia nu simampet mekaan wo makoo’. ⁴ Sa sia mapagholeiyla en tou tumekel, e lewo’ sa reiy’ mouw koo meela ghenang makale’o-le’os en tampa nisia ghimoleiy; kamurian meiy mouw rumeten, ongka’nomi ne’ules waki ne’ana wo ghumoleiy mouw mana. Takar nisia si laa makite’ula wia nikoo sapa e lewo’ sa reiy’ tuanannula.” ⁵ Laa o pokeiy ni Rut wia nisia: “E reiy’ sa mina’asa neiy i lila’mula i ti’i e laa tuanangkula.” ⁶ Nu reiy’ mouw i tu mea mouw sia mea waki tampa pasirian wo tuananna mola e minakatena’ tanu neiy i perentala ni manuangna wia nisia. ⁷ Si Boas nu kimaan wo kimoo’ mola wo natena e melaya-laya’, meiy mouw sia kaa laa meghegholeiyla en tou metetekel witu en tempokna rinurukan en jelai i ti’i. Kamurian meiy mouw si wewene i ti’i rumetenla ampit e memene-menes, i ongka’na momi e ne’ules waki ne’a ni Boas wo ghumoleiy mouw sia witu. ⁸ Witu nedo maparua em bengi ampit neiy i kalo’osit mawongke mouw sitou i ti’i, laa o meringka-ringkapla eng kaledongna, wo kaloo’ala wawean siesa wewene ghimoleiy witu esa nga weka ne’ana. ⁹ Mueiy mouw sia: “Seiy ku’a re’en nikoo i yi’i?” E wingkotna: “Niaku Rut, hambamu: i pitarola satorona eng kale’ekewmu tumerungla si hambamu i yi’i, karengan nikoo mouw siesa kaum waar tumubuus nikeiy. ¹⁰ Laa o pokeiyna: “Berkatenola ni TUHAN satorona nikoo, ee oki’ku! En teakan nikoo koo minapa’ato mola e nupusmu lebepe’ pakaloo’o-loo’ola kasi ta’an eng kasa ketare-tare i ti’i, karengan nikoo koo reiy’ mengi’i-ngi’it se taretumou, le’os si lengeiy ka’apa tu’u si kaya. ¹¹ Eng karengan e ni’itu, oki’ku, te’a mouw meide’; e reiy’ sa mina’asa neiy i lila’mula i ti’i e laa tuanangkula wia nikoo; karengan susur tou wia eng gorem eng kota se kete’uan neiy, kaa nikoo koo esa wewene mele’o-le’os. ¹² Takar en teakan, memang niaku ku esa kaum si waar tumubuus, ta’an ma’anouw tu’u tuana waweane’ kasi siesa tou tumetubuus, si lebe tawi ta’an niaku. ¹³ Mena’ mouw wia nyi’i wengi i yi’i; wo memo’odo wo’odo, sa sia pa’ar tumubuus nikoo, le’os, ma’anouw sia tumubuus; ta’an sa sia so’o tumubuus nikoo, takar niaku mouw si laa tumubuus nikoo, karengan si TUHAN matou-tou. Ghumoleiy mola tumekel i ka’ayo memo’odo.” ¹⁴ Ni’itu mouw ghumoleiy mouw sia tumekel witu esa nga weka ne’ana i ka’ayo memo’odo; laa o tumo’orouw sia, nu reiy’pe’ se tou nu mesesine’uan, karengan em pokeiy ni Boas: “Te’a mouw kakete’uala ne tou, kaa siesa wewene si mineiy waki tampa pasirian.” ¹⁵ O kasi em pokeiyna: “I weemi en sesalelengen pinakemu i ti’i wo i alungola i tu.” Laa o i alungnala en sesalelengen i ti’i. Kamurian takurannala enem tetakur jelai witu en sesalelengen i ti’i. Nu reiy’ mouw i tu mea mouw si Boas waki kota. ¹⁶ Si wewene i ti’i nu neiy mouw i ka’ayola waki si manuangna, lumila’ mouw si manuangna i ti’i: “Kumura oki’ku?” Laa o i susuiynala em baya en tinuanala ni tou i ti’i wia nisia ¹⁷ ma’an limila’: “E nenem takur jelai i yi’i neiy i weenami wia niaku, karengan em pokeiyna: Nikoo koo reiy’ toro mareng waki si manuangmu ampit e lawas memayos.” ¹⁸ Laa o pokeiy ni manuangna i ti’i: “Rumuberola ma’ena’, oki’ku, i ka’ayo koo mamete’ula, kumura eng kesampetan eng kapualitan i ti’i; karengan sitou i ti’i si reiy’ mena’, nu reiy’pe neiy i sampetnala eng kapualitan i ti’i wia i te nendo i yi’i kangkasi.”