¹ Naomi i ti’i si makapunya siesa kawanua waki weteng ni ka’awuna, siesa tou kasa kaya waki se kaum Elimelekh, ngaranna Boas. ² Takar si Rut, wewene Moab i ti’i, limila’ wia si Naomi: “Ma’anouw aku mea waki penguma’an mea murut em bulis-wulis jelai waki muri ne tou mura ate wia niaku.” Wo en singkom ni Naomi wia nisia: “Mea mouw, oki’ku.” ³ Mea mouw sia, laa o i ka’ayola waki penguma’an wo murut en jelai waki muri ne sumesampur-sumesampur; reiy’ tinu’utu’ nisia si witu en tana’ kapunya’an ni Boas, si asal waki se kaum Elimelekh. ⁴ Laa o meiy mouw si Boas waki Betlehem o meiy. Sia lumila’ wia se sumesampur-sumesampur i ti’i: “TUHAN satorona si rumapitla nikouw.” E wingkot nea wia nisia: “TUHAN satorona si merkatla si tuang!” ⁵ Laa o pokeiy ni Boas wia si bujangna si mategha’la se sumesampur-sumesampur i ti’i: “Waki wisa ku’a re’en si wewene i yi’i o meiy?” ⁶ Bujang si mategha’la se sumesampur-sumesampur i ti’i si miningkot: “Nisia nyi’a mouw siesa wewene Moab, nisia si minarengi mewali-wali ampit si Naomi waki daerah Moab. ⁷ Ketare nisia si limila: Iyonala satorona niaku murut wo merurla en jelai waki elet eng ke’ekes-ke’ekes jelai i yi’i waki muri ne sumesampur-sumesampur. Tuana mouw sia mineiy wo reiy’ maena-ena’ maringangar waki memo’odo i ka’ayo en teakan wo ma’an oki’ i te tu’u nisia si reiy’ siena’na.” ⁸ Nu reiy’ mouw i tu lumila’ mouw si Boas wia si Rut: “Lingane’la, rerior oki’ku! Te’a mouw koo mea murut jelai waki penguma’an walina wo te’a mouw kangkasi koo merero’ula wia nyi’i, ta’an mena-ena’ mouw tawi ne mepa’aya-pa’ayangku wewene. ⁹ Lumoo’o mome waki penguma’an eng kasuatan pesampuren ne tou iti’i. Ki’itenola se wewene-wewene i ti’i wia muri. Karengan niaku ku minowerola wia se mepa’aya-pa’ayang tuama te’a maroungla nikoo. Sa koo mare’o, mea mouw waki tampayang-tampayang wo kumoo’ mouw rano en tinakuri ne mepa’aya-pa’ayang i ti’i.” ¹⁰ Laa o kumudu mouw si Rut sumempe ampit eng giona mina’ayo en tana’ wo lumila’ wia nisia: “Ka’a ku’a re’en aku minaka’ato en tongkoupusen waki nikoo, i ka’ayo si tuang si maweela ghenang niaku, e nulitna niaku i yi’i ku esa tou wo’oseiy?” ¹¹ Boas si miningkot: “Neiy mouw i abarla ne tou wia niaku ampit e lekep e reiy’ sa mina’asa wo’o sapa en tinuanamula wia si manuangmu nu reiy’ mouw si ka’awumu nu minate, wo kumura koo timele’ula si ama’ wo si ina’mu wo en tana’ kinatouannu ampit minea wia se esa bangsa eng ketareanna se reiy’ kasine’uannu. ¹² TUHAN satorona si sumuli’la em pasiwo-siwonnu i ti’i, wo wia nikoo satorona i karuniala en tetoromu kawutana ni TUHAN, Empung Israel, wiitu em bawa’ eng kale’ekeuw-Na koo mineiy tumerung.” ¹³ Kamurian lumila’ mouw si Rut: “Memang niaku ku minakato en tongkoupusen waki nikoo, ee tuangku, karengan si tuang si miniborola niaku wo limomponola nate ni hambamu i yi’i, ma’anouw tu’u aku reiy’ masuat tanu si meta’esa’an hamba-hambamu wewene.” ¹⁴ Eng katoroan nedo nu kumaanouw, lumila mouw si Boas wia nisia: “Meiy mouw wia nyi’i, kaanenouw e roti i yi’i wo i sosouwola em pewewoko’mu witu eng gorem en cuka i yi’i.” Laa o rumuberouw sia witu esa nga weka ne sumesampur-sumesampur i ti’i, wo si Boas mapatuu’la e weti’ eng gandum wia nisia; kumaanouw si Rut i ka’ayo wesu, awes tare wawean tele’una. ¹⁵ Sia nu timo’orouw kaa laa mepepurut kasi, takar si Boas si minerentala wia se memema’ayang-memema’ayangna: “Waki elet eng ke’ekes-ke’ekes i ti’i tu’u sia si toro murut, te’a sia perereungen; ¹⁶ awes tare e lewo’ sa reiy’ mouw kouw ampit en tu’utu’un kumeongi mengoki-ngoki’ waki ruruk en jelai i ti’i i wee nisia wo tumele’ula nyi’a, rio purutenna; te’a mouw kouw kasar wia nisia.” ¹⁷ Takar nisia si minurut waki penguma’an i ka’ayo mawengido; laa o sia sumiri em pinurutna i ti’i, wo wawean e wo’o wona’na telu nga pulu’ o enem liter jelai eng kelakerna. ¹⁸ Poponna mola ni’itu, laa o ghumoremouw sia mea waki kota. Eng katoroan si manuangna nu limoo’ sapa em pinurutna i ti’i, wo eng katoroan i ro’unami wo i weenala wia si manuangna en tele’u witu nisia nu wesu mouw i ti’i, ¹⁹ takar lumila’mouw si manuangna wia nisia: “Waki wisa koo minurut wo waki wisa koo mina’ayang nendo i yi’i? Berkatenola satorona sitou si minee mola ghenang nikoo i ti’i!” Laa o i susuiyna mola wia si manuangna i ti’i wia si seiy sia mepa’ayang, em pokeiyna: “Ngaran ni tou wia si seiy aku mepa’ayang nendo i yi’i nyi’a mouw si Boas.” ²⁰ Nu reiy’ mouw i tu lumila’ mouw si Naomi wia si manuangna: “Binerkatola satorona sitou i ti’i ni TUHAN si minepa’ar kimaruniala e nupus lale-Na wia se tou-tou matou-tou wo se minate.” O kasi em pokeiy ni Naomi wia nisia: “Sitou i ti’i si kaum kawanua ta, nisia mouw si meta’esa’an tou waar tumubuus nikita.” ²¹ Laa o pokeiy ni Rut, wewene Moab i ti’i: “Awes kangkasi nisia si limila’ wia niaku: Mena-ena’ mouw tawi ne mepa’aya-pa’ayangku i ka’ayo sea sumampetla e minapekasa em pesampuran em penguma’angku.” ²² Laa o lumila’ mouw si Naomi wia si Rut, manuangna i ti’i: “Ee oki’ku, eng kale’osna koo maro’umi mewali-wali ampit se mepa’aya-pa’ayang wewene, rio koo te’a susanla ne tou waki penguma’an walina.” ²³ Tuana mouw si Rut si minena-ena’ witu se mepa’aya-pa’ayang wewene ni Boas kaa laa mepepurut, i ka’ayo witu noras me’upu’ en jelai wo noras me’upu’ eng gandum nu simampetouw. Wo eng keurean e ni’itu nisia si maena’ wia si manuangna.