¹ Boas si minea mouw waki pepalen leloangan wo rumuber maname. Reiy’ tinu’utu’ lumangkoiy mouw si tumetubuus neiy i totorla ni Boas i ti’i. Laa o lumila’ mouw si Boas: “Heiy patuari, meiype’ ku’a wia nyi’i, rumuberouw wia nyi’i.” Takar meiy mouw sia, laa o rumuber. ² Kamurian pelengenna mola se mapulu’ tou waki em baya ne tu’a-tu’a eng kota iti’i, wo lumila’: “Rumuberouw kouw wia nyi’i.” Takar rumuberouw sea. ³ Laa o lumila’ mouw sia wia si tumetubuus i ti’i: “Tana’ kapunya’an ni patuari ta Elimelekh ni’i pewewangker ni Naomi, si minarengomi waki daerah Moab. ⁴ Ni’itu mouw eng genangku: Le’os kangkasi eng kapualitan i ti’i i pa’ayokula wia nikoo tanume en tumodongla: Telesenouw en tana’ i ti’i witu en sinaru ne tou-tou se rimuber wia nyi’i wo witu en sinaru ne tu’a-tu’a ne bangsa ta. Sa koo pa’ar tumubuus nyi’a, tubuusenouw, ta’an sa koo so’o tumubuus nyi’a, i pakite’u momi wia niaku, rio kete’uangku, karengan e reiy’la tou si toro tumubuus nyi’a ta’an i te nikoo, wo nu reiy’ mouw nikoo: niaku.” Laa o lumila’ mouw sia: “Niaku ku laa tumubuus nyi’a.” ⁵ Ta’an em pokeiy ni Boas: “Witu nedo nikoo nu tumelesi en tana’ i ti’i waki lawas ni Naomi, nikoo koo maka’ato si Rut kangkasi, si wewene Moab, ka’awu ni tou minate mouw i ti’i, kaa laa malinto’orla ngaran ni tou i ti’i witu natas eng kapunya’an pusakana.” ⁶ Laa o lumila’ mouw si tumetubuus i ti’i: “Sa tuana niaku i yi’i ku reiy’ mete’u tumubuus nyi’a, karengan niaku ku laa tumerila eng kapunya’an pusakaku nuesa. Niaku ku maarapla nikoo si tumubuus sapa e lewo’ sa reiy’na tubuusengku, karengan niaku ku reiy’ mete’u tumubuus nyi’a.” ⁷ Tuana mouw eng kenaramen eng ketareanna waki Israel witu eng kapualitan metetubuus wo meteto’or: susur tou si laa ma’ente’la e nesa kapualitan, takar siesa si laa mangkulela en selopna esa nga weka wo meela nyi’a wia se walina. Tuana mouw eng kenaramenna ne tou mesesahla eng kapualitan waki Israel. ⁸ O laa si tumetubuus i ti’i lumila’ wia si Boas: “Nikoo mouw si tumeles nyi’a.” Wo pangkulenna mola en selopna. ⁹ Kamurian lumila’ mouw si Boas wia em baya ne tu’a-tu’a wo wia em baya ne tou witu: “Nikouw mouw wia nendo i yi’i si minamuali sairi, kaa e reiy’ sa mina’asa kapunya’an ni Elimelekh wo e reiy’ sa mina’asa eng kapunya’an ni Kilyon wo ni Mahlon, en telesengkumi waki lawas ni Naomi; ¹⁰ O kangkasi si Rut, wewene Moab i ti’i, ka’awu ni Mahlon, si edongku mamuali ka’awuku kaa laa mewewalinto’orla e ngaran ni tou minate mouw i ti’i witu natas eng kapunya’an pusakana. Tuana mouw e ngaran ni tou i ti’i e reiy’ laa mere’imi waki elet ne patuari-patuarina wo waki elet ne warga eng kota. Nikouw mouw wia nendo i yi’i si minamuali sairi.” ¹¹ Wo se minapekasa tou laker witu em pepalen leloangan, wo em baya ne tu’a-tu’a se limila’: “Nikeiy mouw si minamuali sairi. TUHAN satorona si sumiwo si wewene si laa megheghorem mea witu em balemu i ti’i masuat tanu si Rahel wo si Lea, nisea nu rua se minongke mola se umat Israel. Ma’anouw koo memakmur waki Efrata wo ma’anouw e ngarannu eng kasa kasine’uala waki Betlehem, ¹² see’mu satorona se mamuali tanu se see’ ni Peres se neiy i patoumi ni Tamar i wee si Yehuda eng karengan se oki-oki’ laa i peweweela ni TUHAN wia nikoo waki si wewene sobor i yi’i!” ¹³ O laa si Boas medo si Rut wo si wewene i ti’i minamuali ka’awuna wo tawinna mola sia. Takar kaa eng karunia ni TUHAN si wewene i ti’i si gimandong, laa o tumimea’la siesa oki’ tuama. ¹⁴ Karengan e ni’itu se wewene-wewene se limila’ wia si Naomi: “Kasa mouw lo’oren si TUHAN, si minepa’arouw minale’ nikoo wia nendo i yi’i ampit siesa tumetubuus. Kasa mouw kasine’uala satorona e ngaran ni oki’ i ti’i wia Israel. ¹⁵ Wo nisia mouw si laa sumegaya’la si imukurmu wo malar nikoo witu nedo em bu’ukmu puti’ mouw; karengan si manuangmu si moupusla nikoo si timimea’ mola nisia, wewene si lebe maka arga i wee nikoo ta’an se pitu oki’ tuama.” ¹⁶ Wo si Naomi medomi sioki’ i ti’i ma’an rimeta’la nisia witu em pinalarna wo nisia mouw si maalar nisia. ¹⁷ Wo se ketana’-ketana’ wewene se minee ngaran wia sioki’ i ti’i, em pokeiyna: “Wia si Naomi minatou mouw siesa oki’ tuama”; laa o sea tumotorla e ngaranna Obed. Nisia mouw si ama’ ni Isai, ama’ ni Daud. ¹⁸

18 Nyi’i mouw se see’ ni Peres: Peres si minapaurangla si Hezron,