¹ TUHAN i ti’i si Raja, takar se bangsa-bangsa se matenggo’ogho’. Nisia si rimuber witu natas eng kerub-kerub, takar em bumi minoghe. ² TUHAN i ti’i si kasa wangko’ waki Son, wo Nisia si rakek minatasla se reiy’ sa mina’asa bangsa. ³ Ma’anouw sea kumantarla syukur i wee e ngaran-Nu e wangko’ wo eng hebat; Kudusouw Sia! ⁴ Si Raja ente’, si meupusla e nukum, Nikoo mouw si timaga’la eng kaulitan; nukum wo eng ka’adilan witu e nelet ne see’ ni Yakub, Nikoo mouw si timuanala nyi’a. ⁵ Rakekenola si TUHAN, Empung ta, wo mongkotouw sumempe wia eng kinontoiyan e ne’a-Na! Kudusouw Sia! ⁶ Musa wo si Harun witu e nelet ne imam-imam-Na, wo si Samuel witu e nelet ne tou-tou se maaleiyla e ngaran-Na. Nisea se maaleiy wia si TUHAN wo Nisia si miningkot nisea. ⁷ Witu em pa’asek linaak Nisia si mesesusuiy wia nisea; nisea se timiboiy mouw witu e nge’enge’-nge’enge’-Na wo eng katataapan neiy i wee-Nala wia nisea. ⁸ TUHAN, Empung meiy, Nikoo koo miningkotola nisea, Nikoo si Empung maampungela i wee nisea, ta’an si simuli’ em pasiwo-siwon – pasiwo-siwon nea. ⁹ Rakekenola si TUHAN, Empung ta, wo mongkotouw sumempe witu en sianaru eng kuntung-Na kudus! Karengan kudusouw si TUHAN, Empung ta!