¹ TUHAN nyi’a mouw si Raja! Ma’anouw em bumi merio-rio, ma’anouw laker em pulau mepa’a-pa’ar! ² Linaak wo eng karibe’ebengan em bia esa nga kaledong-Na, ka’adilan wo nukum nyi’a mouw eng kontoiyan en takhta-Na. ³ Napi merangket witu en sinaru-Na, wo rimengisla em baya se kesaru-Na esa nga kaledong. ⁴ Eng kerap-kerap-Na en timerangi eng kaoatan, bumi e limoo’ nyi’a wo matenggo’ogho’. ⁵ Kuntung-kuntung e minerano tanu e lilin witu en sinaru ni TUHAN, witu en sinaru ni Tuhan minapekasa em bumi. ⁶ Langit e minabarla eng ka’adilan-Na, wo se reiy’ sa mina’asa bangsa se limoo’ eng kamulian-Na. ⁷ Em baya ne tou se meraghes wia si patong se laa maka’ato nirang, tou se mesawa’la en tou karengan em berhala-berhala; se reiy’ sa mina’asa empung se maongkot masempe wia-Nisia. ⁸ Sion e liminga nyi’a wo mepa’a-pa’ar, keke’-keke’ Yehuda se merio-rio, eng karengan em peukuman-Nu, eeh TUHAN. ⁹ Karengan Nikoo mouw, eeh TUHAN, Si Kasrakek wia natas e minapekasa em bumi, Nikoo koo kasa i pewangko’la witu natas ne reiy’ sa mina’asa empung. ¹⁰ Heiy tou-tou se meupusla si TUHAN, ri’irisenouw eng kalewo’an! Sia, si miniara e nyawa ne tou-tou se neiy i koupus-Nala, si laa mayami nisea waki lawas ne tou-tou fasik. ¹¹ Terang e rimetikouw i wee se tou ulit, wo e mepa’a-pa’ar i wee se tou-tou uli-ulit ate. ¹² Mepa’a-pa’arouw karengan si TUHAN, heiy tou-tou ulit, wo kantarenola en syukur i wee e ngaran-Na kudus.