¹ Sombayang ni Musa, abdi ni Empung. Tuhan, Nikoo mouw koo tampa paterungan neiy see’ o see’. ² Nu reiy’pe’ eng kuntung-kuntung neiy i patoula, wo em bumi wo eng kaoatan nei i paanakla, awes tare e waki keure-urena i ka’ayo eng keure-urena Nikoo mouw si Empung. ³ Nikoo koo minarengla se tou witu e riawu, wo lumila’: “Marengouw, heiy oki-oki’ ni tou!” ⁴ Karengan witu em beren-Nu esa nga riwu nge te’un masuat tanu e nendo eng kaawi’in, sakawisa lumangkoiy, ka’apa tanu e nesa pontol e lukar witu e nedo wengi. ⁵ Nikoo koo minayurla se tou: nisea se tanu e me’ipi, tanu e rukut matou, ⁶ witu e nedo memo’odo mawungang wo matou, witu e nedo mawengindo eng kesut wo weles. ⁷ Nulit, nikeiy keiy mina’apu minere’I karengan e nupi’-Mu, wo eng karengan e kenanaran e nupi’-Mu nikeiy keiy neiy i kasenge’. ⁸ Nikoo koo minee eng kaselokan neiy witu en sinaru-Mu, wo en dosa meiy neiy i kakirong witu en sena’na eng gio-Mu. ⁹ Nulit, e reiy’ sa mina’asa nendo meiy e limangkoiy karengan eng kasa upi’-Mu, nikeiy keiy mina’apula en te’un-te’un neiy tanu e nga’angal. ¹⁰ E masa em patou-touan neiy em pitu nga pulu’ nge te’un wo sa keiy ente’, e nuwalu nga pulu’ nge te’un, wo eng kesawa’anna nyi’a mouw eng kasusa’an wo em peme’itan; karengan eng kelelangkoiyna e mario-rior, wo nikeiy keiy minerar minere’i. ¹¹ Seiy ku’a re’en si sumine’u eng kaente’an e nupi’-Mu wo meide’ witu eng kasa kaupi’an-Nu? ¹² Turu’enouw nikeiy rumeken e nendo-nendo meiy esa nga tuana, i ka’ayo keiy maka’ato e nate sama’. ¹³ Marengomi, eeh TUHAN – pirape’ eng keure kasi? – wo i koupusola se hamba-hamba-Mu! ¹⁴ Wesunola keiy witu e nedo memo’odo ampit e nupus lale’-Mu, rio keiy merio-rio wo mepa’a-pa’ar esa nga orasna e nendo-nendo meiy. ¹⁵ Siwonouw nikeiy mepa’a-pa’ar minaimbangan ampit e nendo-nendo Nikoo nu limotoiy nikeiy, minaimbangan ampit en te’un-te’un nikeiy nu mine’ani en cilaka. ¹⁶ Ma’anouw kaloo’an wia se hamba-hamba-Mu em pasiwo-siwon-Nu, wo en serengat-Mu wia se oki-oki’ nea. ¹⁷ Satorona eng kamura’an ni Tuhan, Empung meiy, witu nikeiy, wo te’etepenola em pasiwo-siwon e lawas meiy, yon, em pasiwo-siwon e lawas meiy, te’etepenola i tu.