¹ Kekantaren pawee teturu’ ni Etan, tou e Ezrahi. Niaku ku laa mekekantarla e nupus o lale’ ni TUHAN eng keure-urena, laa mapasine’ula eng kelale’an-Nu ampit en sumaku see’ o see’. ² Karengan e nupus lale’-Mu em binangun i wee eng keure-urena; eng kelale’an-Nu e minalinto’or tanu e langit. ³ Nikoo koo limila’ mola: “Ku mina’akesola teta’aran ampit se tou pineleng-Ku, Niaku ku timiwa’ mola wia si Daud, hamba-Ku: ⁴ I wee eng keure-urena Niaku ku laa malinto’orla se oki’ puyunnu, wo mangun en takhtamu see’ o see’.” S e l a (maseng) ⁵ Kaa ni’itu e langit e masyukur karengan e maka’erangen-maka’erangen-Nu, eeh TUHAN, awes tare karengan eng kelale’an-Nu witu e nelet ne jema’ah ne tou-tou kudus. ⁶ Karengan seiy ku’a re’en waki linaak-linaak si mateper ampit si TUHAN, si masuat tanu si TUHAN witu e nelet ne maena’ waki sorgawi? ⁷ Empung si paormaten witu eng kaledong ne tou-tou kudus, wo si kasa i keide’la limantouwla em baya se witu eng kaledong-Na. ⁸ Oh TUHAN, Empung e minapekasa alam, seiy ku’a re’en si tanu Nikoo? Nikoo koo ente’, eeh TUHAN, wo eng kelale’an-Nu em bitu eng kaledong-Mu. ⁹ Nikoo mouw si maperenta eng katingkeiyan en tasik, witu e nedo minatas em balolong-balolongna, Nikoo kangkasi si minompasla nyi’a. ¹⁰ Nikoo mouw si rimimu’umukla si Rahab tanu sitou kinawunu’an, ampit e lalupa-Mu eng kaente’ Nikoo koo minena’ata-na’atasola se kesaru-Mu. ¹¹ Punya-Mu mouw e langit, punya-Mu mouw kangkasi em bumi, kaoatan ma’an em pumpunena Nikoo mouw si timo’otolela nyi’a. ¹² Amian wo en timu, Nikoo mouw si simiwola nyi’a, Tabor wo eng Hermon e merio-rio karengan e ngaran-Nu. ¹³ Punya-Mu mouw e lalupa waraneiy, nente’ e lawas-Mu wo rakek e lawas lele’os-Mu. ¹⁴ Ka’adilan wo nukum nyi’a mouw eng kontoiyan en takhta-Mu, nupus wo eng kelale’an makelang witu e rerior-Mu. ¹⁵ Ma’aruiyola se bangsa se sigha’ merio-rio, eeh TUHAN, nisea se matou-tou witu en sena’na eng gio-Mu; ¹⁶ karengan e ngaran-Nu nisea se merio-rio kelabotan e nendo, wo karengan eng ka’adilan-Nu nisea se mesawa’. ¹⁷ Karengan Nikoo mouw si kamulia’an kaente’an nea, wo karengan Nikoo koo minepa’ar, en sunge meiy e rumakek. ¹⁸ Karengan eng kekelung ta eng kapunya’an ni TUHAN, wo si raja ta si kapunya’an Ni Kudus Israel. ¹⁹ Mekasa mouw Koo masusuiy witu em paloo’an wia se tou-tou i koupus-Mula, pokeiy-Mu: ²⁰ Niaku ku minaka’ato mola si Daud, hamba-Ku; Niaku ku minisu’ mola nisia ampit e lana-Ku kudus, ²¹ takar e lawas-Ku e minena-ena’ ampit nisia, awes tare e lalupa- Ku en time’etepla nisia. ²² Kesaru se reiy’ laa rumego nisia, wo se tou wiles se reiy’ laa lumotoiy nisia. ²³ Niaku ku laa kumemumi se kesaruna waki sinaruna, wo se tou-tou se mari’iris nisia se laa-Ku wunu’un. ²⁴ Kelale’ang-Ku wo e nupus-Ku e merapitla nisia, wo eng karengan e ngaran-Ku en sungena e laa rumakek. ²⁵ Niaku ku laa sumiwo e lawasna kumuasala en tasik, wo e lawas lele’osna eng kumuasala en so’oso’an-so’oso’an. ²⁶ Nisia tu’u si laa maleiy wia-Niaku: ‘Ama’ku Nikoo, Empungku wo kuntung watuku kelawirangku.’ ²⁷ Niaku tu’u kangkasi ku laa mopo nisia mamuali oki’ polon, mamuali si kasarakek witu e nelet ne raja-raja em bumi. ²⁸ Niaku ku laa mepepiara e nupus lale’-Ku i wee nisia i wee eng keure-urena, wo en teta’aran-Ku en te’etep i wee nisia. ²⁹ Niaku ku merame e laa wawean se oki’ puyunna i ka’ayo eng keure-urena, wo en takhtana esa nga umur e langit. ³⁰ Sa se oki-oki’na se tumele’ula en Taurat-Ku wo nisea se reiy’ matou-tou maki’it e nukum-Ku, ³¹ sa eng katataapang-Ku e langkoiyen nea wo reiy’ tumiboiy witu em perenta-perenta-Ku, ³² takar Niaku ku laa sumuli’ e linangkoiy nea ampit en tetengkel wo eng kaselokan nea ampit em bewewe-bewewe. ³³ Ta’an e nupus lale’-Ku e reiy’ laa-Ku i wa’akati waki nisia wo Niaku ku reiy’ laa tumuana em biles witu eng kapualitan eng kelale’ang-Ku. ³⁴ Niaku ku reiy’ laa lumangkoiy en teta’aran-Ku, wo en sapa e rimou’mi waki sumping-Ku e reiy’ laa-Ku roban. ³⁵ Mekasa Ku tumiwa’ demi eng kakudusang-Ku, tantu mouw Niaku ku reiy’ laa tumowo wia si Daud: ³⁶ Se oki’ puyunna se laa wia i wee eng keure-urena, wo en takhtana en tanu siendo witu en saruan em beren-Ku, ³⁷ Tanu si sumedot si wia eng keure-urena, e nesa sairi e lale’ waki linaak-linaak.” S e l a (maseng) ³⁸ Ta’an Nikoo nuesa koo simede’ wo timea’, mina kasa moupi’ wia se tou se ni’isu’-Mula, ³⁹ mino’opolela en teta’aran ampit se hamba-Mu, rimi’irisela e mahkotana e nasar e riawu, ⁴⁰ timoro e reiy’ sa mina’asa em betonna, simiwo e rereen-rereenna minamuali riberek. ⁴¹ Em baya ne tou se melangkoiy waki lalan se maro’obit nyi’a, wo nisia si minamuali sering i wee se ketana’na. ⁴² Nikoo koo rimakekola e lawas lele’os em baya ne kesaruna, simiwo mola em baya ne kesaruna mepa’a-pa’ar. ⁴³ O kangkasi Nikoo koo minurikitla em beren en santina, wo reiy’ simiwo nisia toro tumaang witu em paseke’an. ⁴⁴ Nikoo koo minena’la eng kaserengatanna, wo en takhtana e neiy-Mu i pe’epesla wia em bumi. ⁴⁵ Nikoo koo minototela e masa mudana, Nikoo koo timutuwla nisia ampit e nirang. S e l a (maseng) ⁴⁶ Pirape’ eng keure kasi, eeh TUHAN, Koo kumirong e mapawee-wee, mawua-wuaya e nupi’-Mu nasar e napi? ⁴⁷ Ghenangenouw sapa e numur em patou-touani ti’i, kumura e reiy’ sipenoronna Koo simiwola em baya se oki’ ni tou! ⁴⁸ Seiy ku’a re’en sitou si matou-tou wo si reiy’ me’anla em patean, si toro lumiseiyla e nyawana waki kuasa eng kaoatan ne tou minate? S e l a (maseng) ⁴⁹ Waki wisa ku’a re’en e nupus lale’-Mu eng kasa ketare-tare, eeh Tuhan, e neiy mouw i ta’ar-Mula ampit en tiwa’ wia si Daud demi eng kelale’an-Nu? ⁵⁰ Ghenangenouw en sering ni hamba-Mu, eeh Tuhan, kaa witu em be’ewerku niaku ku timanggong em pasero’an ne reiy’ sa mina’asa bangsa, ⁵¹ e neiy i pasoti ne kesaru-kesaru-Mu, eeh TUHAN, neiy i pasoti maweleiy e nenus eng ke’ang ne tou se ni’isu’-Mula. ⁵² Lino’orouw si TUHAN i wee eng keure-urena! Amin, yon amin.