1 Kekantaren. Mazmur ne bani Korah. I wee si ma’aka-aka ne biduan. I ki’it e lagu: Mahalat Leanot. Kekantaren pawee teturu’ ni Haman, tou e Ezrahi. Oh TUHAN, Empung si limawirla niaku, nendo oat niaku ku mengale-ngaleiy, witu e nedo wengi niaku ku sumaru Nikoo. 2 Ma’anouw en sombayangku meiy witu en sinaru-Mu, i se’elengomi en talinga-Mu witu e rekeiyku; 3 karengan si imukurku si wesu ampit eng kacilaka’an, wo em patou-touangku en tawi mouw eng kaoatan ne tou minate. 4 Niaku ku i papokeiy mola neiy i kaghorem se tou-tou timumpame witu e ruragh eng kubur; Niaku ku tanu sitou si reiy’ makaketer. 5 Niaku ku lewo’ sa reiy’ mena’ witu e nelet ne tou-tou minate, tanu se tou-tou minate winunu’, neiy i kagholeiy witu eng kubur, se reiy’ mouw ghenangen-Nu kasi, karengan nisea se neiy i kerangkuti waki kuasa-Mu. 6 Neiy-Mu mouw i weela niaku witu e ruragh eng kubur kasa wawa’, witu eng kareiydeman, witu en tampa kerarem. 7 Niaku ku neiy i keubel em pasu’ e nupi’-Mu, wo e reiy’ sa mina’asa em pete’an em balolong-Mu e neiy-Mu i empis wia niaku. S e l a (maseng) 8 Neiy-Mu mouw i wa’akatla se kawanua-kawanuaku waki niaku, siniwo-Mu mola niaku minamuali kasa wuruk i wee nisea. Niaku ku kinetaangan wo reiy’ mete’u rumou’; 9 berenku en timekur karengan em peme’itan. Niaku ku minaleiy mola wia-Nikoo, eeh TUHAN, kelabotan e nendo, kimaya’ mola e lawasku wia-Nikoo 10 Sapa ku’a re’en Koo timuanala e maka’erangen i wee se tou-tou minate? Ma’an tu’u e arwah en tumo’or kaa laa mee syukur wia-Nikoo? S e l a (maseng) 11 Toro ku’a re’en e nupus-Mu ni’i abarla witu eng gorem eng kubur, wo eng kelale’an-Nu witu en tampa kapunengan? 12 Kinete’uala ne tou ku’a re’en e maka’erangen-maka’erangen-Nu witu eng kareiydeman, wo eng ka’adilan-Nu waki wanua e reiy’ sa mina’asa liur? 13 Ta’an niaku i yi’i, eeh TUHAN, wia-Nikoo ku marekeiy makitulung, wo witu e nedo memo’odo en sombayangku e mineiy witu en sinaru-Mu. 14 Ka’a, eeh TUHAN, Koo tumea’ niaku, Koo kumirongla eng gio-Mu waki niaku? 15 Niaku ku neiy i kalotoiy wo minamuali pekeki’iten e maut rengan oki’pe’, niaku ku minesa’anouw e mekeide’en waki-Nikoo, niaku ku reiy’ siarapan. 16 Kenanaran e nupi’-Mu en timoro niaku, kahebatan-Nu e minu’ukulela niaku, 17 limedongla niaku tanu e rano songker kelabotan e nendo, limi’iker niaku minakarengan. 18 Neiy-Mu mouw i wa’akati waki niaku se kalo wo se ka’ampit, kawanua-kawanuaku nyi’a mouw eng kareiydeman.