1 Sombayang ni Daud. I se’elengomi en talinga-Mu, eeh TUHAN, wingkotenouw niaku, karengan peme’itan wo miskin niaku. 2 Piaranouw e nyawaku, karengan niaku ku tou neiy i koupus-Mula, lawirenola si hamba-Mu si ma’eman wia-Nikoo. 3 Nikoo nyi’a mouw si Empungku, i koupusola niaku, eeh Tuhan, karengan wia-Nikoo mouw niaku maaleiy eng kelabotan e nendo. 4 Siwonouw si imukur ni hamba-Mu mepa’a-pa’ar, karengan wia-Nikoo mouw, eeh Tuhan, popongku si imukurku. 5 Karengan Nikoo, eeh Tuhan, si le’os wo pa’ar maampungela wo limokon e nupus o lale’ i wee em baya ne tou se maaleiy wia-Nikoo. 6 Ta’anola en talinga witu en sombayangku, eeh TUHAN, wo weeanola ghenang en suara paaleiyengku. 7 Witu e nendo kase’esekangku niaku ku maaleiy wia-Nikoo, karengan Nikoo koo mingkot niaku. 8 Reiy’la si tanu Nikoo witu e nelet em baya ne empung, eeh Tuhan, wo e reiy’la tanu en sapa en siniwo-Mu. 9 Se reiy’ sa mina’asa bangsa se siniwo-Mula se laa meiy mongkot sumempe witu en sinaru-Mu, eeh Tuhan, wo laa mewewangko’la e ngaran-Nu. 10 Karengan Nikoo koo wangko’ wo matuanala e maka’erangen-maka’erangen; Nikoo nuesa i te si Empung. 11 I tudu’ mola wia niaku e lalan-Nu, eeh TUHAN, rio aku tumou kumi’it eng kaulitan-Nu; tabulelengenola e nateku kaa laa meide’la e ngaran-Nu. 12 Niaku ku laa mesesyukur wia-Nikoo, eeh Tuhan, Empungku, ampit em pakasa’an e nateku, wo memuliala e ngaran-Nu i wee eng keure-urena; 13 karengan e nupus lale’-Mu e wangko’ witu niaku, wo Nikoo koo minaya momi e nyawaku waki kaoatan ne tou minate eng kasa wawa’. 14 Oh Empung, se tou-tou tingkeiy se timo’orouw marego niaku, wo se rambangan ne tou-tou tingkeiy se pa’ar mesesawut e nyawaku, wo se reiy’ mepadungla Nikoo. 15 Ta’an Nikoo, eeh Tuhan, Empung tongkoupusen wo mengupus, labot sabaar wo limokon e nupus wo lale’. 16 Lumenge mouw wia niaku wo i koupusola niaku, i wee momi eng kaente’an-Nu wia si hamba-Mu, wo lawirenola sioki’ tuama ni hamba-Mu wewene! 17 Tuananola wia niaku e nesa kowa’ kale’osan, rio se tou-tou se mari’iris niaku se lumoo’ ampit e nirang, kaa Nikoo, eeh TUHAN, si timulungola wo miniborla niaku.