¹ I wee si ma’aka-aka ne biduan. Mazmur ne bani Korah. Nikoo koo minepa’arola wia en tana’-Mu, eeh TUHAN, simegaya’ mola eng ka’ada’an ni Yakub. ² Nikoo koo minampungola eng kaselokan ne umat-Mu, minenetola e reiy’ sa mina’asa en dosa nea. S e l a (maseng) ³ Nikoo koo limo’olosola e reiy’ sa mina’asa eng kaupi’an-Nu, minompasola e nupi’-Mu melaya-layas. ⁴ Segaya’enola nikeiy, eeh Empung, lumelawir meiy, wo re’inola e rara ate-Mu wia nikeiy. ⁵ I wee eng keurena ku’a re’en Nikoo meupi’ witu nikeiy wo mapawee-weela e nupi-Mu wia se see’ o see’? ⁶ Sapa ku’a re’en Nikoo koo so’o metetoula nikeiy sumeup, i ka’ayo se umat-Mu se mepa’a-pa’ar karengan Nikoo? ⁷ I pakiloo’ mola wia nikeiy e nupus lale’-Mu, eeh TUHAN, wo i wee momi wia nikeiy eng kelawiran waki-Nikoo! ⁸ Niaku ku pa’ar luminga sapa e laa i penenuwu’la ni Empung, TUHAN. Reiy’ ku’a re’en Nisia si laa sumusuiy tanume en dame wia se umat-Na wo wia se tou-tou neiy i koupus-Nala, rio te’a sea mareng wia eng kawe’engelan? ⁹ Eng kaulitna eng kelawiran waki-Nisia en tawi wia se tou-tou se meide’la Nisia, i ka’ayo eng kamulia’an e mena’ witu em banua ta. ¹⁰ Nupus wo eng kelale’an e laa masungkul, ka’adilan wo en dame sejahtera e laa menio-niongan. ¹¹ Kelale’an e laa tumoumi waki bumi, wo eng ka’adilan e laa lumalesi waki langit. ¹² Awes tare si TUHAN si laa meela eng kale’osan, wo em banua ta e laa mee wua’na. ¹³ Ka’adilan e laa kumelang witu en sinaru-Na, wo e laa sumiwo e nenus ne’a-Na mamuali lalan.