¹ I wee si ma’aka-aka ne biduan. I ki’it e lagu: Gitit. Mazmur ne bani Korah. 2 Kumura kinasenaangala en tampa paena’an-Nu, eeh TUHAN em pakasa’an e alam! ² Imukurku si minakemu karengan malelola em podol-podol ni TUHAN; nateku wo e le’onaku e merio-rio wia si Empung matou-tou. ³ Awes tare se wara ringkeng se minaka’ato mola e nesa wale, wo se wara pisok e nesa sala, en tampa maweela se oki-oki’na, witu e mezbah-mezbah-Mu, eeh TUHAN e minapekasa alam, eeh Rajaku wo Empungku! ⁴ Ma’aruiyola se tou-tou se maena’ witu em bale-Mu, se reiy’ siena’na melo’o-lo’or Nikoo. S e l a (maseng) ⁵ Ma’aruiyola sitou eng kaente’anna em bitu Nikoo, si kasa pa’ar mezeziarah! ⁶ Sakawisa lumease eng kewong Baka, nisea se sumiwo nyi’a mamuali tampa e makakembu’an; awes tare e naro witu eng ketareani noras en timutuwi nyi’a ampit em berkat. ⁷ Nisea se makelang mekeurela se makaente’la, se laa mesesaru si Empung waki Sion. . ⁸ Oh TUHAN, Empung e minapekasa alam, linganola en sombayangku, I ta’anouw en talinga, eeh Empung ni Yakub. S e l a (maseng) ⁹ Loo’onouw eng kekelung meiy, eeh Empung, tu’usanouw eng gio ni tou si ni’isu’-Mula! ¹⁰ Karenga e lebe le’os e nesa nga endo witu em podol-Mu ta’an e nesa nga riwu nga endo witu en tampa walina; lebe le’os rumedeiy witu reten em pepalen em bale ni Empungku ta’an mena’ witu en dasing-dasing ne tou fasik. ¹¹ Karengan si Empung TUHAN nyi’a mouw siendo wo kekelung; nupus wo eng kamulia’an neiy i wee-Nala; Nisia si reiy’ timaang eng kale’osan waki se tou matou-tou reiy’ sisering. ¹² Oh TUHAN e minapekasa alam, ma’aruiyola sitou si ma’eman wia-Nikoo!