¹ Mazmur ni Asaf: e nesa kekantaren. Oh Empung, te’a mouw Koo minakapenes, te’a mouw makapenes en tou wo te’a mouw mepepalar e lawas, eeh Empung! ² Karengan eng kaulitna se kesaru-kesaru-Mu se rungkea’, se tou- tou se mari’iris Nikoo se merakekla eng kokong. ³ Nisea se simiwola em paasa-asa’an e wiles mesaru se umat-Mu, wo nisea se marunding kaa laa sumaru se tou-tou tinerungan-Nula. ⁴ Pokeiy nea: “Meiy mouw kita rume’ila nisea tanume se bangsa, i ka’ayo e ngaran Israel e reiy’ mouw ghenangen kasi!” ⁵ Nulit, nisea se rimundingola ampit e nesa ate, nisea se simiwo mola teta’aran sumaru Nikoo: ⁶ Se maena’ witu en dasing-dasing ni Edom wo se tou Ismael, Moab wo se tou eng Hagar, ⁷ Gebal wo Amon wo Amalek, Filistea ma’an se penduduk en Tirus, ⁸ o kangkasi e Asyur eng kima’ampetola ampit nisea, minamuali ne’a o lawas ne bani Lot. S e l a (maseng) ⁹ Patuananola nisea tanu e Midian, tanu en Sisera, tanu e Yabin tawi en so’oso’an Kison, ¹⁰ se pinunengola waki En-Dor, minamuali pupuk i wee en tana’. ¹¹ Siwonouw em baya ne pamuka-muka nea tanu si Oreb wo si Zeeb, tanu si Zebah wo si Salmuna em baya ne ma’aka-aka nisea, ¹² se limila’: “Meiy mouw kita rumuberla en tampa-tampa paena’an ni Empung!” ¹³ Oh Empungku, siwonouw sea tanu e rinte’na mangatetewel, tanu en daami pasengon e reghes! ¹⁴ Tanu e napi matunu en talun, wo tanu layasna e napi marengisla eng kuntung-kuntung, ¹⁵ ki’itenouw sea ampit e reghes tumokol-Mu, wo senge’enola sea ampit e ma’edo lewo’-Mu; ¹⁶ wutanola eng gio nea ampit eng kahina’an, rio sea sumero e ngaran-Nu, eeh TUHAN! ¹⁷ Ma’anouw sea maka’ato e nirang wo i kasenge’ eng keure-urena; ma’anouw sea mapaira-irang wo mapuneng, ¹⁸ rio sea mete’u kaa Nikoo mouw i te si mekengaran TUHAN, Si Kasarakek witu e minapekasa em bumi.