1 I wee si ma’aka-aka ne biduan. I ki’it e lagu: wungang bakung. Kasairian ni Asaf. Mazmur. Heiy rumerawir ne Israel, i ta’anouw en talinga, Nikoo si rimawir si Yusuf tanume si kawang ne domba! Yon Nikoo, si rimuber witu natas em baya eng kerub, mapa’ato mouw sumena’ 2 witu en saruan ni Efraim wo ni Benyamin wo ni Manasye! I to’orenola eng kewaraneiyan-Nu wo meiy mouw kaa laa melelawirla nikeiy. 3 Oh Empung, segaya’enomi nikeiy, siwonouw eng gio-Mu sumena’, takar nikeiy keiy laa melawir. 4 TUHAN, Empung em pakasa’an alam, pirape’ eng keure kasi e nupi’-Mu melayas ma’anouw tu’u se umat-Mu se masombayang? 5 Nikoo koo minee nisea kumaan e roti patiisan e lue’, Nikoo si minee nisea kumoo’ e lue’ meloko-lokon, 6 Nikoo si simiwo nikeiy minamuali kinapoongan pe’isingan ne ketana’-ketana’ meiy, wo se kesaru-kesaru meiy se menero-nero’ nikeiy. 7 Oh Empung em pakasa’an alam, segaya’enola keiy, siwonouw eng gio-Mu sumena’ , takar nikeiy keiy laa melawir. 8 E niedo-Mu momi e nakana e nanggor waki Mesir, se neiy mouw i sere’-Mu se bangsa-bangsa, laa o i tanem-Mu e nakana i ti’i. 9 Nikoo koo simadia mola tampa i we nisia, takar kumalatouw sia rimare-rarem wo mutala em banua; 10 eng kuntung-kuntung eng kinaterungan eng kumalenoan-kumalenoanna, wo e nakana-nakana aras ni Empung kaa em pangana-pangana; 11 neiy i renetnala em pangana-pangana mina’ayome waki tasik, wo en sobor-soborna e mina’ayome waki so’oso’an Efrat. 12 Ka’a Koo lumuwek em betonna, i ka’ayo sia tipu’en ne susur tou malangkoiy? 13 Wi’o se meka’aretla nyi’a wo se tekapen-tekapen waki padang se kimaan nyi’a. 14 Oh Empung em pakasa’an alam, marengomi satorona, tembonomi waki langit, wo loo’onouw! Padungenola e nakana nanggor i yi’i, 15 wa’atang neiy i tanem e lawas lele’os-Mu! 16 Nisea se timunu mola nyi’a ampit e napi wo minele nyi’a; ma’anouw sea i kaliong ma’apu kaa e rekakan eng gio-Mu! 17 Satorona e lawas-Mu en tumerungla sitou si witu esa nga weka lele’os-Mu, sioki’ ni tou si tine’etep-Mu mola i wee en tou-Mu i ti’i, 18 takar nikeiy keiy reiy’ laa sume’epangi waki-Nikoo. Ma’anouw keiy tumou’, takar nikeiy keiy laa maleiyla e ngaran-Nu. 19 Oh TUHAN, Empung em pakasa’an alam, segaya’enomi keiy, siwonouw eng gio-Mu sumena’, takar nikeiy keiy laa melawir.