¹ I wee si ma’aka-aka ne biduan. i ki’it: e Yedutun. Mazmur ni Asaf. Niaku ku pa’ar mengale-ngaleiy ampit e menaleinteng wia si Empung, ampit e menaleinteng wia si Empung, rio Sia lumingala niaku. ² Witu e nendo kasusa’angku niaku ku sumero si Tuhan; mawengi-wengi e lawasku neiy i karenet wo e reiy’ minalewea’, imukurku si reiy’ mepa’ar iboren. ³ Sakawisa ku ghumenang si Empung, takar niaku ku kumuouw, sakawisa ku tumekur, eng kasa malewea’ reawa’ mouw en semangatku. S e l a (maseng) ⁴ Nikoo koo simiwo em berenku minena-ena’ minawuka’; niaku ku balisa, i ka’ayo reiy’ mete’u meila-ila’. ⁵ Niaku ku meghena-ghenang e nendo-nendo en zaman purbakala, en te’un-te’un en zaman ketareanna eng ginenangku. ⁶ Niaku ku menoto-notor witu nedo wengi witu e nateku, niaku ku timekur, wo e rohku e menero-nero: ⁷ “I wee eng keurena ku’a re’en si Tuhan sumede’ wo reiy’ mareng mamura ate kasi? ⁸ Minere’i mouw ku’a re’en i wee e mapawee-weena e nupus lale’-Na, kimawusouw ku’a re’en en ta’ar i ti’i pepaken ne see’ o see’? ⁹ Minaliurouw ku’a re’en si Empung mee e mekeupusen, ka’apa em pinenet-Na ku’a re’en e rahmat-Na karengan e nupi’-Na?” S e l a (maseng) ¹⁰ Takar em pokeiyku: “Nyi’i mouw eng kimuek e nateku, kaa e lawas lele’os Ni Kasarakek e minaroba.” ¹¹ Niaku ku laa megheghenang em pasiwo-siwon – pasiwo-siwon ni TUHAN, yon, niaku ku laa megheghenang e maka’erangen-maka’erangen-Nu waki zaman em purbakala. ¹² Niaku ku laa metetoto-totor e reiy’ sa mina’asa em pepa’ayangen-Nu, wo ghumenangla em pasiwo-siwon – pasiwo-siwon-Nu. ¹³ Oh Empung, e lalan-Nu nyi’a mouw eng kudus! Empung wisa ku’a re’en si tuana eng kewangko’ tanu si Empung meiy? ¹⁴ Nikoo mouw si Empung si timuanala e maka’erangen; Nikoo koo minapaloo’o-loo’o mola eng kuasa-Mu witu e nelet ne bangsa-bangsa. ¹⁵ Ampit e lalupa-Mu Nikoo koo timubuusola se umat-Mu, se bani Yakub wo se bani Yusuf. S e l a (maseng) ¹⁶ E rano e limoo’ mola Nikoo, eeh Empung, e rano e limoo’ mola Nikoo, laa o mameide’, awes tare e lawanan wangko’ en timinggo’ogho’. ¹⁷ Linaak-linaak e matoa’mi rano, linaak-malinaak e mengeder, awestare se oki-oki’ em panah-Mu se mangatetelew. ¹⁸ Neder e lenter-Mu e mawolon, eng kerap-kerap e materangi eng kaoatan, bumi e matinggo’ogho’ wo maoghe. ¹⁹ Matorola en tasik e lalan-Nu wo e lorong-Mu e matorola muka en dano kapelas ta’an e nenus-Mu e reiy’ paloo’ola. ²⁰ Nikoo koo rimawirola se umat-Mu tanu se kawang ne domba ampit e nieletala ni Musa wo ni Harun.