¹ I wee si ma’aka-aka ne biduan. Ampit em pema’ayangan kecapi. Mazmur ni Asaf. Kekantaren. Empung si kasa kasine’uan waki Yehuda, ngaran-Na e masyur waki Israel! ² Waki Salem waweanouw e lekouw-Na, wo em paena’an-Na e waki Sion! ³ Mana mome e rinepu’-Nala em pana maserengat, kekelung wo en santi wo em pakakas i paseke’. S e l a (maseng) ⁴ Maserengat Nikoo, e lebe mulia ta’an eng kuntung e wia rengane’ em purba. ⁵ Tou-tou berani se rinemu’ mola, nisea se neiy i kare’erep witu en tekelna wo em baya ne tou waraneiy se kinaliongan eng kaketeranna. ⁶ Eng karengan e rekak-Mu, eeh Empung ni Yakub, se kinatekelan re’erep le’os si mengali ka’apa tu’u si kawalo. ⁷ Hebat Nikoo! Seiy ku’a re’en si tumaang rumedeiy witu en sinaru-Mu witu e nedo Nikoo nu meupi? ⁸ Waki langit Nikoo koo minapalingala eng katenggolan-Nu; bumi e mineide’ wo neiy i kenganga, ⁹ witu e nedo si Empung nu tumo’or kaa laa mewewee peukuman, kaa laa melelawirla em baya se neiy i kalotoiy wia em bumi. S e l a (maseng) ¹⁰ Eng kaulitna em pasu’ e nate ni tou e laa mamuali syukur i wee-Nikoo, wo en tele’u em pasu’ ate i ti’i e laa i pakiereten-Nula. ¹¹ Mee mouw nazar wo wearenouw e nazarmu i ti’i wia si TUHAN, Empungmu! Ma’anouw em baya ne tou se witu eng kaledong-Na se ma’ayola en sesempe wia Nisia si neiy i keide’la, ¹² Nisia si rimepu’la en semangat em baya ne ma’aka-aka, Nisia si hebat i wee se raja-raja wia em bumi.