¹ Kekantaren pawee teturu’ ni Asaf. Ka’a, eeh Empung, Koo tumea’ nikeiy i wee e minapawee-weena? Ka’a melayas e nupi-Mu witu se membe’ domba rerawiran-Nu? ² Ghenangenola se umat-Mu se kina’atoan-Nu mola witu en zaman purbakala, se tinubuus-Mu minamuali bangsa kapunya’an-Nu nuesa! Ghenangenola eng kuntung Sion e niena’an-Nu. ³ Wure’enola eng ke’angan-Nu mea witu en tampa teri minapawee-weena; e reiy’ sa mina’asa – sa mina’asana e rine’i mola ne kesaru waki tampa kudus. ⁴ Kesaru-kesarumu se makukuk witu en tampa pinasungkulan-Nu wo rimedeiy mola em panji-panji nea tanume eng kowa’. ⁵ Paloo’ola nyi’a en tanu sitou minayongla rimake-rakek e nesa pati wia eng kayu-kayuan e rirung, ⁶ wo en teakan e lumi-lumianna minapekasa nyi’a e winangkeng nea ampit em pati wo em pisouw; ⁷ nisea se timutung en tamapa kudus-Mu ampit e napi, nisea se kimemo’la en tampa paena’an e ngaran-Nu i ka’ayo wia en tana’; ⁸ nisea se meila’ witu natena: “Le’osouw kita lumotoiy nisea em baya nea!” Nisea se matunu e reiy’ sa mina’asa tampa tete’upan ni Empung waki wanua. ⁹ Eng kowa’-kowa’ meiy e reiy’ linoo’ meiy, e reiy’ mola kasi si nabi, wo e reiy’la witu e nelet meiy si mete’ula pirape’ eng keure kasi. ¹⁰ Pirape’ eng keure kasi, eeh Empung, se kesaru i ti’i maweleiy, wo se kesaru kumemo’ e ngaran-Nu e reiy’ siena’na? ¹¹ Ka’a Koo kimeong sumeup e lawas-Mu, rumeta’ e lawas lele’os- Mu witu em be’ewer? ¹² Ta’anouw Nikoo, oh Empung nyi’a mouw si Rajaku wakipe’ en zaman purbakala, si timuanala em pelawiran wia natas em bumi. ¹³ Nikoo mouw si kimewe’ en tasik ampit eng kaente’an-Nu, si minete’la eng kokong ne leloiy’-leloiy’ naga witu natas en dano. ¹⁴ Nikoo mouw si rimimu’umukla eng kokong-kokong ne Lewiatan, si mineela nyi’a minamuali kekaanen ne maena-ena’ waki padang pelas. ¹⁵ Nikoo mouw si kimewe’ eng kembu’an wo en so’oso’an; Nikoo mouw si minerala en so’oso’an-so’oso’an e reiy’ siena’na maso’oso’. ¹⁶ Punya-Mu mouw e noat, punya-Mu mouw kangkasi em bengi. Nikoo mouw si minee se tumeterang wo siendo. ¹⁷ Nikoo mouw si timataapla e reiy’ sa mina’asa em paakaran em bumi, noras ra’ar wo noras e naro Nikoo mouw si simiwo-Nyi’a. ¹⁸ Ghenangenouw e nyi’i: kesaru se maweleiy, eeh TUHAN, wo se bangsa e ba’abal i ti’i se makewur e ngaran-Nu. ¹⁹ Te’a mouw i peweweela e nyawa ni pombomu wia se tekapen siru! Te’a mouw paliuren e minapawee-weena e nyawa ne tou-tou-Mu se neiy i kalotoiy! ²⁰ Lumoo’o mouw witu en teta’aran, karengan en tampa-tampa reiydem wia em bumi wuta en sala-sala eng kaketean. ²¹ Te’a mouw i pewewayala se tou neiy i kale’e-le’ek se warengen ampit tena’an en sering. Ma’anouw se tou peme’itan wo se tou miskin se melo’o-lo’or e ngaran-Nu. ²² Tumo’orouw, eeh Empung, tuananola em pe’inakuten-Nu! Ghenangenola e weleiy wia-Nikoo waki weteng ne tou ba’abal kelabotan e nendo. ²³ Te’a mouw liuren en suara ni kesaru-Mu, e neder ne tou-tou se timo’or mesesu’usuk Nikoo, se minapawee-weena makaente’la.