¹ Wia-Nikoo, eeh TUHAN, niaku tumerung, te’a ma’an mekasa niaku maka’ato e nirang. ² I waya momi niaku wo i liseiyomi niaku kaa eng ka’adilan-Nu, se’elengomi en talinga-Mu wia niaku wo lawirenola niaku! ³ Mamuali mouw i wee niaku kuntung watu, tampa paterungan, rereen petaangan kaa laa lumawirla niaku; karengan Nikoo mouw koo kentur watuku wo petaangangku. ⁴ Oh Empungku, i liseiyomi niaku waki lawas ne tou fasik, waki rino’omesan ne tou-tou wengi’is wo lewo’. ⁵ Karengan Nikoo mouw koo arapangku, eeh Tuhan, ka’emanangku rengane’ e masa muda, eeh EMPUNG. ⁶ Wia-Nikoo mouw niaku timobol muleiymi waki gandongan, Nikoo koo rimou’ momi niaku waki po’ot ni ina’ku; Nikoo koo reiy’ siena’na pelo’o-lo’orengku. ⁷ I wee se laker tou niaku ku tanu eng kowa’ maka’erangen, karengan Nikoo mouw si tampa paterungangku ente’. ⁸ Sumaku e wuta ampit em puji-pujian wia-Nikoo, ampit em paormatan wia-Nikoo kelabotan e nendo. ⁹ Te’a mouw i petetea’ niaku witu e nedo katu’angku, te’a mouw i petetele’ula niaku sakawisa eng kaente’angku ma’apu. ¹⁰ Karengan se kesaru-kesaruku se mengila-ngila’ en tanume niaku, se tou-tou se menegha-negha’ e nyawaku se marunding mewali-wali ¹¹ wo meila: “Empung si timele’u mola nisia, ki’iten wo sikopenouw sia, karengan e reiy’la si rumeta’mi nisia!” ¹² Oh Empung, te’a mouw mewa’akat wia niaku! Empungku, makarenganouw tulungen niaku! ¹³ Ma’anouw maka’ato e nirang wo ma’apu se tou-tou se masu’sukla e imukurku; ma’anouw ma’anouw makane’ulesela em beleiy wo en sering se tou-tou se mame’inakutla en cilakaku! ¹⁴ Ta’an niaku ku reiy’ maena-ena’ pa’ar maarap wo mawes em puji-pujian wia-Nikoo; ¹⁵ sumaku e laa sumusuiyla eng ka’adilan-Nu wo eng kelawiran waki-Nikoo kelabotan e nendo, karengan niaku ku reiy’ mete’u rumeken nyi’a. ¹⁶ Niaku ku meiy ampit eng kewaraneiyan-kewaraneiyan ni EMPUNG Tuhan, laa mememasyurla eng ka’adilan-Nu i te! ¹⁷ Oh Empung, Nikoo koo minajarola niaku rengan ku oki’pe’, wo i ka’ayo en teakan niaku ku maabarla em pasiwo-siwon-Nu e maka’erangen; ¹⁸ o kangkasi i ka’ayo eng katua’angku wo puti’ em bu’ukeku, oh Empung, te’a mouw metetele’ula niaku, rio aku mabarla eng kuasa-Mu wia se angkatan i yi’i, kewaraneiyan-Nu wia se tou laa meiy. ¹⁹ Ka’adilan-Nu, oh Empung, mina’ayo e langit. Nikoo si timuana mola eng kapualitan-kapualitan e wangko’. Oh Empung, seiy ku’a re’en si tanu Nikoo? ²⁰ Nikoo si simiwo mola niaku mine’ani laker kasusa’an wo eng kacilaka’an, Nikoo koo laa tumoula niaku sumeup, wo waki lawanan wangko’ em bumi Nikoo koo laa lumongkoti niaku sumeup. ²¹ Nikoo koo laa mawes eng kasela’angku wo laa lumengemi mibor niaku. ²² Niaku tu’u ku pa’ar kumantarla e mazmur i wee-Nikoo ampit eng kecapi, oh Si Kudus Israel. ²³ Sumpingku e merio-rio kasuatan mekantarla e mazmur i wee-Nikoo, o kangkasi si imukurku si neiy mouw i waya-Mumi. ²⁴ Lila’ku kangkasi e menoto-notor eng ka’adilan-Nu kelabotan e nendo, karengan se laa maka’ato nirang wo mekeirangan se tou-tou se mame’inakutla en cilakaku.