¹ I wee si ma’aka-aka ne biduan. I ki’it e lagu: Wungang bakung. Waki si Daud. Lawirenola niaku, eeh Empung, karengan en dano minurepouw mina’ayo witu e lee’ku! ² Niaku ku timeneme witu e gha’agharan kerarem, e reiy’la sitampa pelele’ekan; niaku ku neiy mouw i kare’esoke witu en dano kerarem, em balolongan minurep e minayurla niaku. ³ Reawa’ aku karengan e mengale-ngaleiy, en tikooku minapera;em berenku e nge’enget karengan maarapla si Empungku. ⁴ Se tou-tou se mari’iris niaku reiy’ sitino’otolan se lebe laker ta’an em bu’uk witu eng kokongku; taleus ka’asa’an eng kelakerna se tou-tou se laa mepepunengla niaku, se mesu’usukla niaku reiy’la eng kimarengan; niaku ku papupusan laa marengla sapa e reiy’ kinaatku. ⁵ Oh Empung, Nikoo koo mete’ula eng kawe’engelangku, eng kaselokan-kaselokangku e reiy’ neiy i kakirong i wee-Nikoo. ⁶ Te’a mouw maka’ato irang eng karengan niaku se tou-tou mengena-ngena’la Nikoo, eeh Tuhan, EMPUNG e minapekasa alam! Te’a mouw tena’an en sering eng karengan niaku se tou-tou masero Nikoo, eeh Empung Israel! ⁷ Eng karengan Nikoo mouw niaku ku timanggong e weweleiy, en sering en simaputla eng gioku. ⁸ Niaku ku minamuali mouw tou luar i wee se patuari-patuariku, tou wo’oseiy i wee se oki-oki’ ni ina’ku; ⁹ karengan e nupus i wee em bale-Mu e rimengisla niaku, wo e lelila’an-lelila’an e maweleiy Nikoo en timoro mola niaku. ¹⁰ Niaku ku rimimu’umukla en touku ampit e maposo, ta’an e ni’itu tu’u e minamuali weleiy i wee niaku; ¹¹ niaku ku simiwo e roko’ pengasi’ minamuali labungku, niaku ku minamuali sesindiren i wee nisea. ¹² Niaku ku minamuali wu’ana en sumping ne tou-tou se rimuber witu em pepalen leloangan, ampit eng kecapi se mengengoo’-mengengoo’ se mekantar en tanume niaku. ¹³ Ta’an niaku, ku masombayang wia-Nikoo, eeh Tuhan, witu e nedo Nikoo nu mepa’ar, eeh Empung; demi e nupus lale’-Mu e wangko’ wingkotenouw niaku ampit en tetulungan-Nu e lale’! ¹⁴ I waya momi niaku waki ghorem e lipetek, rio te’a aku i katenem, ma’anouw aku i wayami waki se tou-tou se mari’iris niaku, wo waki rano kerarem! ¹⁵ Te’a mouw em balolongan en dano e mayurla niaku, ka’apa en tebir e nume’enep niaku, ka’apa em parigi e menet en sumana witu natasku. ¹⁶ Wingkotenouw niaku, eeh TUHAN, karengan e nupus lale’-Mu e le’os, lumenge momi wia niaku i ki’it e rahmat-Mu kewangko’! ¹⁷ Te’a mouw i pekekirongla eng gio-Mu wia si hamba-Mu, karengan niaku ku neiy i kase’esek; makarenganouw mingkot niaku! ¹⁸ Meiy mouw wia niaku, tubuusenouw niaku, i waya momi niaku eng karengan se kesaru-kesaruku. ¹⁹ Nikoo koo sumine’u em beleiyku, nirangku wo en seringku; em baya ne kesaruku se witu en sinaru-Mu. ²⁰ E weleiy i ti’i e rimepu’ mola nateku, wo niaku ku reiy’ siarapan; niaku ku ma’ena’la en tongkoupusen, ta’an e reiy’ sipenoron, ma’ena’la se mengengibor-mengengibor, ta’an se reiy’ niatokula. ²¹ Awes tare, nisea se minee niaku kumaan e racung, wo witu e nedo niaku nu mare’o, nisea se minee niaku kumoo e nanggor esem. ²² Ma’anouw en sesakeiyan em bitu en saruan nea e mamuali we’etes, wo en tetabea nea e mamuali perangkap. ²³ Ma’anouw em beren nea mareiydem, i ka’ayo sea reiy’ maloo’; siwonouw e rereenan nea e moghe reiy’ maena-ena’! ²⁴ I toa’ momi e nupi’-Mu witu natas nea, wo ma’anouw e nupi’-Mu melaya-layas en tumoro nisea. ²⁵ Ma’anouw em pedasingan nea e mapenes, wo ma’anouw en dasing-dasing nea e reiy’la si maena’na. ²⁶ Karengan nisea se mekeki’it sitou winewe-Mu, nisea se minawes e rumara ne tou-tou se kinuek-Mu. ²⁷ Awesanola selok wia en selok nea, wo te’a mouw i ka’ayo Koo mulitela nisea! ²⁸ Ma’anouw sea re’ini waki kaol em patou-touan, te’a mouw sea i kepatik mewali-wali ampit se tou-tou ulit! ²⁹ Ta’an niaku i yi’i ku neiy i kalotoiy wo kinerara’an, eng kelawiran waki-Nikoo, eeh Empung, satorona en tumerungla niaku! ³⁰ Niaku ku laa melo’o-lo’or e ngaran ni Empung ampit eng kekantaren, mewangko’la Nisia ampit eng kekantaren syukur; ³¹ witu em paloo’ala ni Empung ni’itu e lebe le’os ta’an si sapi raghar, ta’an si sapi raghar si makasunge wo makasulu kewe’. ³² Loo’onouw, heiy tou-tou se kumeng ate, wo mepa’a-pa’arola; nikouw si masero si Empung, ma’anouw e natemu en tumou sumeup! ³³ Karengan si TUHAN si malingala se tou-tou miskin, wo reiy’ maloo’ola hina se tou-tou-Na witu en tahanan. ³⁴ Ma’anouw e langit wo em bumi e melo’o-lo’or Nisia, en tasik wo e reiy’ sa mina’asa se maoghe witu eng goremna. ³⁵ Karengan si Empung si laa lumawirla en Sion wo mangun eng kota-kota Yehuda, rio se tou-tou se mena’ maname wo makapunyala nyi’a; ³⁶ oki’ o puyun ne hamba-hamba-Na se laa maka’ato nyi’a, wo se tou-tou se meupusla e ngaran-Na se laa mena’ witu.