¹ I wee si ma’aka-aka ne biduan. Mazmur ni Daud. Kekantaren Empung si timo’or, takar i kasera mouw se kesaru-kesaru-Na, se tou-tou se mari’iris Nisia se timingkasi en tou waki sinaru-Na. ² Tanu nawun e limiong neiy i kasengo, tanu e lilin minerano witu en saruan e napi, tuana mouw se tou-tou fasik minapuneng witu en sinaru ni Empung. ³ Ta’an se tou-tou ulit se mepa’a-pa’ar, nisea se merio-rio witu en sinaru ni Empung, melaya-laya’ wo mepa’a-pa’ar. ⁴ Kumantarouw i wee si Empung, mazmurenola e ngaran-Na, siwonouw e lalan i wee Nisia si mengali malease e linaak-linaak! Ngaran-Na nyi’a mouw si TUHAN; merio-rio mouw witu en sinaru-Na! ⁵ Ama’ i wee se oki’ ula wo Tumeterung em baya ne balu, ni’itu mouw si Empung si waki paena’an-Na kudus; ⁶ Empung si minee tampa paena’an wia se tou-tou se maesa-esa mokan, Nisia si rimou’mi se tou-tou tinaang, i ka’ayo ma’aruiy, ta’an se rumerangu-rumerangu se mena’ waki tana’ e ro’opong. ⁷ Oh Empung, eng katoroan Nikoo nu minaju maseke’ witu en saruan ne umat-Mu, eng katoroan Nikoo nu make’ang waki padang pelas, S e l a (maseng) ⁸ moghe mouw em bumi, awes tare e langit en timoa’mi e naro witu en sinaru ni Empung; Sinai e minoghe witu en sinaru ni Empung, Empung Israel. ⁹ E naro limokon neiy i serew-Mumi, eeh Empung; Nikoo koo simegaya’la en tana’ kapunya’an-Nu e rese, ¹⁰ i ka’ayo se kawang ne tekapen-Nu se minena’ maname; witu eng kale’osan-Nu Nikoo koo minutala em pemandungen ne tou se neiy i kalotoiy, eeh Empung. ¹¹ Tuhan si mina’ayola e lelila’an; se tou-tou se minali e nabar le’os i ti’i se tanula se suraro e wangko’: ¹² Raja-raja ne reiy’ sa mina’asa suraro se timingkasla en tou, timingkasla en tou, wo se wewene waki wale se memete-meteng e rinemu’. ¹³ Pa’ar ku’a re’en kouw lumo’or witu e nelet eng kalero-kalero? Kale’ekew-kale’ekew ne pombo en sino’okep ampit em perak, e wu’uk eng kale’ekewna ampit e mas maserenga-serengat. ¹⁴ Katoroan Si Kasakuasa nu simarakan se raja-raja maname, tumumpa mouw en salju waki atas eng kuntung Zalmon. ¹⁵ Kuntung ni Empung eng kuntung Basan i ti’i, eng kuntung makatoka kelaker eng kuntung Basan i ti’i! ¹⁶ Heiy kuntung-kuntung e makatoka kelaker, ka’a kouw makirit metayur, wia eng kuntung neiy i kepa’arla ni Empung mamuali tampa reruberan-Na? Eng kaulitna si TUHAN si laa mena’ maname i wee e mapawee-weena! ¹⁷ Kareta-kareta ni Empung em pulu’an nga riwu, awes tare e mangariwu-riwu eng kelakerna; Tuhan si mineiy mouw waki Sinai, ghumorem mea waki tampa kudus! ¹⁸ Nikoo koo limongkotome mea waki tampa rakek, minali mouw se tinaang-tinaang; Nikoo koo simungkulola en sesempe-sesempe witu nelet ne tou, awes tare waki se rumerangu-rumerangu kaa laa mena’ maname, eeh Empung TUHAN. ¹⁹ Lino’orouw si Tuhan! Nendo demi e nendo Nisia si timanggong i wee nikita; Empung nyi’a mouw si kelawiran ta. S e l a (maseng) ²⁰ Empung i wee nikita nyi’a mouw si Empung melawirla, EMPUNG, Tuhanku, si mineemi kaliseiyan waki maut. ²¹ Eng kaulitna, Empung si rimimu’umukla eng kokong ne kesaru- Na, tereuka’ eng kokong e makawu’uk waki se tou se minena-ena’ matou-tou witu eng kaselokan-kaselokanna. ²² Tuhan si minee mola nuwu’: “Waki Basan e laa-Ku alini sumeup, e laa-Ku alini sumeup waki tampa kerarem, ²³ rio koo moas e ne’amu witu e raa’, wo e lila’ ne asu-asumu e maka’ato wetengna waki se kesaru.” ²⁴ Tou se limoo’ e rineokan-Nikoo, eeh Empung, rineokan si Empungku, Rajaku, mea witu eng gorem en tampa kudus. ²⁵ Waki rerior makelang se kumekantar-kumekantar, waki muri se memema’ayang-memema’ayang kecapi, witu eng keuneran se dayang-dayang se mate’etek e rebana. ²⁶ “Witu se jema’ah lumo’orouw si Empung, nyi’a i yi’i si TUHAN, heiy nikouw si asal waki kembu’an Israel!” ²⁷ I ti’i si Benyamin, si taweng, si makelang witu e rerior nea, pamuka-muka – pamuka-muka ne Yehuda se maongko-ongkor, pamuka-muka – pamuka-muka ne Zebulon, pamuka-muka – pamuka-muka ne Naftali. ²⁸ I oghe mola eng kaente’an-Nu, eeh Empung, i papa’ato mola eng kaente’an-Nu, eeh Empung, Nikoo si mininta’ mola i wee nikeiy. ²⁹ Demi em bait-Mu waki Yerusalem, raja-raja se mina’ayola en sesempe wia-Nikoo. ³⁰ Rekakenouw se tekapen-tekapen waki teberau, kawang ne tou-tou ente’, makua-kuasa – makua-kuasa ne bangsa-bangsa! I le’ekouw sea se mekeki’it em perak; i sarakanola se bangsa-bangsa se pa’ar maseke’! ³¹ Waki Mesir se tou-tou se minalimi em barang-barang tambaga, Etiopia e minakarengan kimaya’la e lawasna wia si Empung. ³² Heiy keraja’an-keraja’an em bumi, kumantarouw i wee si Empung, memazmurouw i wee si Tuhan; S e l a (maseng) ³³ i wee Nisia si mengali malease e langit purbakala. Weeanola ghenang, Sia si minapalingala en suara-Na, en suara-Na kahebat! ³⁴ Akunola eng kakuasa’an ni Empung; eng kewangko’an-Na em bitu natas ne Israel, kakuasa’an-Na witu eng gorem e linaak-linaak. ³⁵ Empung nyi’a mouw si hebat waki ghorem em tampa kudus-Na; Empung Israel, Nisia si kimaruniala eng kakuasa’an wo eng kaente’an wia se umat-Na. Lino’orouw si Empung!