1 I wee si ma’aka-aka ne biduan. Kekantaren Mazmur. Merio-rio mouw i wee si Empung, heiy minapekasa em bumi, 2 I mazmurola eng kewangko’an e ngaran-Na, wangko’enola Sia ampit em puji-pujian! 3 I lila’ mola wia si Empung: “Kumura eng kahebatna e reiy’ sa mina’asa em pepa’ayangen-Nu; karengan eng kaente’an-Nu eng kewangko’ se kesaru-Mu se tu’utuk masila’ wia-Nikoo. 4 Minapekasa em bumi se maongkot masempe wia- Nikoo, wo memazmur i wee-Nikoo, memazmurela e ngaran-Nu.” S e l a (maseng) 5 Mea mouw wo loo’onouw em pepa’ayangen-pepa’ayangen ni Empung; Nisia si hebat witu em pasiwo-siwon-Na witu se tou: 6 Nisia si rimoba en tasik minamuali tana’ pera, wo se tou-tou i ti’i se makelang malewetla en so’oso’an. Eng karengan e ni’itu nikita kita mepa’a-pa’ar kaa Nisia, 7 si maperenta ampit eng kahebat i wee eng keure-urena, em beren-Na e mategha’la se bangsa-bangsa. Rumerangu-rumerangu se reiy’ mete’u rumakekla en tou. S e l a (maseng) 8 Lo’orenouw si Empung meiy, heiy bangsa-bangsa, wo i papalinga mola em puji-pujian wia-Nisia! 9 Nisia si minangintaangela si imukur meiy witu em patou-touan wo reiy’ mayala e ne’a meiy moghe. 10 Karengan Nikoo koo minuji mola nikeiy, eeh Empung, limenasola nikeiy tanu sitou malenasla em perak. 11 Nikoo koo minali mola nikeiy mea witu eng gorem em pure’eket, minakela pawuter witu e rereenan neiy; 12 Nikoo koo minaya mola se tou-tou lumease eng kokong meiy, nikeiy keiy timoro momi e napi wo en dano; ta’an Nikoo koo rimou’ momi nekeiy i ka’ayo keiy i kewayami. 13 Niaku ku laa ghumorem witu eng gorem em bale-Mu ampit e maali en tetule-tetule tinunu, niaku ku laa mear wia-Nikoo e nazarku, 14 e neiy mouw i totorla en sumpingku, wo neiy i lila’la en sumaku witu e nedo niaku nu pedis. 15 En tetule-tetule tinunu waki se tekapen rebur e laaku i sempela wia-Nikoo, ampit e nawun en tetule waki se domba-domba raghar; niaku ku laa sumadiala se sapi-sapi wo se membe’-membe’ raghar. S e l a (maseng) 16 Meiy mouw, linganouw, heiy nikouw nu waya se meide’la si Empung, niaku ku laa mesesusuiyla sapa en tinuana-Nala witu en touku. 17 Wia-Nisia niaku ku minaleiy mola ampit en sumaku, e yi’in ampit e lila’ku niaku ku kumantarla em pujian. 18 Sa wona’na wawean eng kepa’aran lewo’ witu e nateku, tantu mouw si Tuhan si so’o luminga. 19 Eng kaulitna, si Empung si liminga mola, Nisia si minee mola ghenang en sesombayangen neiy ku i totorla. 20 Lino’orouw si Empung, si reiy’ masede’ en sombayangku wo e reiy’ mina’akatla e nupus lale’-Na waki niaku.