¹ I wee si ma’aka-aka ne biduan. Ampit em pema’ayangan kecapi. Waki si Daud, Linganola satorona e naleiyku, eeh Empung, weeanola ghenang en sombayangku! ² Waki tempok em bumi niaku ku maaleiy wia-Nikoo, karengan e nateku e lewea’ reawa’; teperenouw niaku mea waki kuntung watu en taleus rakek i wee niaku. ³ Nuli-ulit Nikoo koo minamuali mouw tampa paterungangku, pewale kaente’ witu se kesaru. ⁴ Ma’anouw aku tume’up witu eng gorem en dasing-Mu i wee eng keure-urena, ma’anouw aku tumerung witu en sinalangkouwan eng kale’ekew-Mu! S e l a (maseng) ⁵ Nuli-ulit, Nikoo, eeh Empung, si liminga mola e nazarku, minuta mola em pengiween ne tou-tou se meide’la e ngaran-Nu. ⁶ Awesanola e numur ni raja, en te’un-te’un em patou-touanna satorona i ka’ayo se see’ o see’; ⁷ satorona sia si mena’ witu en sinaru ni Empung eng keure-urena, i titah mola e nupus o lale’ wo eng kaulitan en tumayur nisia. ⁸ Takar niaku ku laa mememazmurla e ngaran-Nu eng keurena, kasuatan niaku nu mear e nazarku e nendo demi e nendo.