¹ I wee si ma’aka-aka ne biduan. I ki’it e lagu:Wungang bakung kasairian. Miktam waki si Daud kaa laa i pa’ajarla, eng katoroan nisia nu simeke’la se tou Aram-Mesopotamia wo se tou Aram-Zoba, wo eng katoroan si Yoab witu e nedo nu marengi minewe mola minekala se mapulu’ o rua nga riwu tou Edom waki Kewong Wurasen, Oh Empung, Nikoo koo timea’ mola nikeiy, limampat em petaangan neiy; Nikoo koo mineupi’ mola; segaya’enola nikeiy! ² Nikoo koo minoghe mola em bumi wo kimewe’la nyi’a; le’osenola e reka’-reka’na, karengan em bumi e minoghe mouw. ³ Nikoo koo simiwo mola se umat-Mu mine’anla em peme’itan e wuter, Nikoo koo minee mola nikeiy kumoo’ e nanggor e makapusingen. ⁴ Wia nisea se meide’ wia-Nikoo se wineean-Nu mola em panji- panji, eng kowa’ kaa laa kumelung witu em panah. S e l a (maseng) ⁵ Rio i kaliseiy se tou-tou neiy i koupus-Mula, weeanola kelawiran ampit e lawas lele’os-Mu wo wingkotenouw nikeiy! ⁶ Empung si minee momi nuwu’ waki tampa kudus-Na: “Niaku ku laa merio-rio, Niaku ku laa memete-metengla en Sikhem, wo eng kewong Sukot e laa-Ku pe’ukuren. ⁷ Punya-Ku eng Gilead wo em punya-Ku e Manasye. Efraim sia mouw si tumeterung eng kokong-Ku, Yehuda sia mouw si wulu’ eng keraja’ang-Ku; ⁸ Moab sia mouw si tampa paosang-Ku, wia si Edom Niaku ku limawala eng kasut-Ku, karengan si Filistea Niaku ku merio-rio.” ⁹ Seiy ku’a re’en si laa mali niaku mea waki kota makarereen? Seiy ku’a re’en si laa tumeper niaku mea waki Edom? ¹⁰ Reiy’ ku’a re’en Nikoo, eeh Empung, si timea’ mola nikeiy, wo si reiy’ minaju, eeh Empung, mewali-wali se pasukan perajurit ne suraro meiy? ¹¹ Weeanola wia nikeiy en tetulungan witu se kesaru, karengan e reiy’la sipenoron em pelawiran waki sitou. ¹² Ampit si Empung e laa ta tuananla em pasiwo-siwon – pasiwo-siwon waraneiy, karengan Nisia nuesa si laa mele’e-le’ek em baya se kesaru ta.