¹ I wee si ma’aka-aka ne biduan. I ki’it e lagu: Te’a mepepunengela. Miktam waki si Daud, eng katoroan si Saul nu rimeo tou mategha’la em balena kaa laa mewewunu’ nisia, I waya momi niaku waki se kesaruku, eeh Empungku; bentenenola niaku witu se tou-tou se timo’or mesaru niaku.. ² I waya momi niaku waki se tou-tou se matuanala eng kalewo’an wo lawirenomi niaku waki se tumetoa’-tumetoa’ raa’. ³ Karengan eng kaulitna, nisea se minape’ e nyawaku; se tou-tou waraneiy se rimego niaku, e nulitna niaku ku reiy’ timuanala eng kaselokan, niaku ku reiy’ makadosa, eeh TUHAN, ⁴ niaku ku reiy’ siselok, nisea mouw se timingkas wo mineniro-niro’. Meiy mouw matola niaku, wo loo’onouw! ⁵ Nikoo, TUHAN, Empung em pakasa’an alam, nyi’a mouw si Empung Israel. Tumo’orouw kaa laa mukum se reiy’ sa mina’asa bangsa; te’a mouw me’upusla nisea se matuanala eng kalewo’an ampit e mase’epang! S e l a (maseng) ⁶ Witu e nedo mawengindo nisea se mineiy sumeup nisea se manguang tanu se asu wo maledongla eng kota. ⁷ Eng kaulitna nisea se masindir ampit en sumana; en sero’ em bitu en sumping nea, karengan – seiy ku’a re’en si luminga nyia’? ⁸ Ta’an Nikoo, TUHAN, koo make’eke’la nisea, Nikoo koo memele-meleiy se reiy’ sa mina’asa bangsa. ⁹ Eeh kaente’angku, niaku ku pa’ar metetiboiy wia-Nikoo, karengan si Empung nyi’a mouw si kota bentenku. ¹⁰ Empungku ampit e nupus lale’-Na si laa sumungkul niaku; Empung si laa sumiwo niaku mapokeiyla kumeng se kesaru-kesaruku. ¹¹ Te’a mouw mewewunu’ nisea, rio se bangsaku se reiy’ maliur, sere’ mouw nisea mea o meiy ampit eng kuasa-Mu, wo i ka’anu mola nisea , eeh Tuhan, kekelung meiy! ¹² Karengan en dosa en suma nea nyi’a mouw e lelila’an en sumping nea, ma’anouw sea kasikopan witu eng katingkeiyanna. Eng karengan en tiwa’ kutok wo en towo neiy i susuiy neala, ¹³ ka’apunola sea witu e nupi’, ka’apunola, i ka’ayo sea reiy’ mouw wia kasi, rio sea mawena’as kaa si Empung si maperenta witu e nelet ne see’ ni Yakub, i ka’ayo en tempokna em bumi. S e l a (maseng) ¹⁴ Witu e nedo mawengindo nisea se mineiy sumeup, nisea se manguang tanu se asu maledongla eng kota. ¹⁵ Nisea se malepu menero kumaan; sakawisa sea reiy’ mawesu, takar nisea se manguang. ¹⁶ Ta’an niaku ku pa’ar mekekantarla eng kaente’an-Nu, witu e nedo memo’odo niaku ku pa’ar merio-rio karengan e nupus lale’-Mu; karengan Nikoo koo minamuali mouw kota bentenku, tampa patingkasangku witu e nedo kase’esekangku. ¹⁷ Eeh kaente’angku, i wee-Nikoo ku pa’ar mememazmur; karengan si Empung nyi’a mouw si kota bentenku, Empungku ampit e nupus lale’-Na.