¹ I wee si ma’aka-aka ne biduan. I ki’it e lagu: Te’a mepepunengela. Miktam waki si Daud. Nulit ku’a re’en nikouw kouw mawee katenggolan e nadil, heiy em baya ne makua-kuasa? ² Awes tare e minatoroan ampit eng kepa’arannu kouw timuanala eng kalewo’an, lawasmu, e makelangla eng kalewo’an wia em bumi. ³ Rengane’ e minatou se tou-tou fasik se sime’epangouw, rengane’ waki gandongan se tumetowo-tumetowo se simeipouw. ⁴ Racung nea tanu e racung ni leloiy’, nisea se tanu si leloiy’ item lunteng si minenet en talingana, ⁵ se reiy’ malingala en suara ne mengengutok-mengengutok ka’apa en suara ne mememaca en doti kasigha’. ⁶ Oh Empung, kemunola em ba’ang nea em bitu en sumana, repu’enola em ba’ang-ba’ang ne singa-singa muda, eeh TUHAN! ⁷ Ma’anouw sea i kaliong tanu en dano simo’oso’ minere’i! Ma’anouw sea maweles tanu en dukut witu e lalan! ⁸ Ma’anouw sea tanu se siput minamuali kerar, tanu e ra’araghan ni wewene si reiy’ limoo’ siendo. ⁹ Nu reiy’pe’ eng kure’-kure’mu me’anla e napi eng kongkom tetunean, en tinoro-Na mola le’os se matou-tou segaya’ ka’apa tu’u se minarengis. ¹⁰ Sitou ulit i ti’i si laa mepa’a-pa’ar, karengan nisia si lumoo’ en sesuli’an, sia si laa moas e ne’ana witu e raa’ ne tou fasik. ¹¹ Wo se tou se laa lumila’: “Eng kaulitna wawean wu’ana le’os i wee se tou ulit, eng kaulitna wawean si Empung si mawee ka’adilan wia em bumi.”