¹ I wee si ma’aka-aka ne biduan. I ki’it e lagu: Pombo se witu e nakana-nakana en tarbantin kewa’akat. Miktam waki si Daud, katoroan se tou em Filistin nu simikop nisia waki Gat. I koupusola niaku, eeh Empung, karengan se tou-tou se mele’e-le’ek niaku, eng kelabotan e nendo se tou se maseke’la niaku wo mase’esek niaku! ² Kesaru-kesaruku se mele’e-le’ek niaku eng kalabotan e nendo, awes tare kelaker tou se maseke’la niaku ampit eng katingkeiy. ³ E nedo niaku nu meide’, niaku i yi’i ku ma’eman wia-Nikoo; ⁴ wia si Empung, e nuwu’-Na em palo’orengku, wia si Empung niaku ma’eman, niaku ku reiy’ meide’. Sapa ku’a re’en en toro tuananla ni tou witu niaku? ⁵ Kelabotan e nendo nisea se maserokla em perkaraku; nisea se reiy’ siena’na mekemaksut lewo’ wia niaku. ⁶ Nisea se pa’ar mererego, nisea se maetip, menegha-negha’la eng ke’angku, tanu se tou-tou se pa’ar mesesawut e nyawaku. ⁷ Sapa ku’a re’en nisea se toro i kaliseiyi ampit eng kalewo’an nea? I rewa mola se bangsa-bangsa ampit e nupi’-Mu, eeh Empung! ⁸ Em peme’itangku Nikoo mouw si mereke-reken., e lue’ku neiy i wee-Mu witu eng gorem en sompoiy-Mu. Reiy’ ku’a re’en em baya nyi’a e neiy-Mu mouw i daftarla? ⁹ Takar se kesaruku se laa I kewareng witu e nedo niaku nu maleiy; niaku ku ma’eman, kaa si Empung si maedo-edo niaku. ¹⁰ Wia si Empung, nuwu’-Na e lo’orengku, wia si TUHAN, nuwu’-Na e lo’orengku, ¹¹ wia si Empung niaku ma’eman, niaku ku reiy’ meide’. Sapa ku’a re’en en toro siwonla ni tou witu niaku? ¹² Nazarku wia-Nikoo, eeh Empung, e laa tuanangkula, wo en tetule syukur e laa wearengku wia-Nikoo. ¹³ Karengan Nikoo koo limiseiyomi niaku waki maut, awes tare timayur e ne’aku, i ka’ayo e reiy’ neiy i kasu’usu’; takar niaku ku toro kumelang witu en sinaru ni Empung witu en sena’na em patou-touan.