¹ I wee si ma’aka-aka ne biduan. Ampit em pema’ayangan kecapi. Kekantaren pawee teturu’ ni Daud. Weeanouw talinga, eeh Empung, wia en sombayangku, te’a mouw mekekirong witu em paaleiyengku! ² Weeanola ghenang niaku wo wingkotenouw niaku! Niaku ku limepu wo maame’ karengan eng kori’, ³ karengan e rekeiyan ne kesaru, karengan en siasa’an ne tou fasik; karengan nisea se timorola eng kabelotan wia niaku, wo ampit e we’etenganna nisea se masu’usukla niaku. ⁴ Nateku em balisa, mekeide’en e maut en timoro mola niaku. ⁵ Niaku ku rineung e nide’ wo meide’, pedaman mekeide’en e simaputla niaku. ⁶ Genangku: “Sawona’na aku wineean teteleuw tanu si pombo, niaku ku laa tumeleuw wo sumero en tampa kapenesan, ⁷ awes tare niaku ku laa tumingkas wa’aka-wa’akat wo mapawengi waki padang gurun. S e l a (maseng) ⁸ Niaku ku laa makarengan sumero tampa paterungan witu e reghes ente’ wo e reghes tumokol.” ⁹ Likokonola sea, serokenola en sesususiyen nea, eeh Tuhan, karengan niaku ku limoo’ eng kalewo’an wo em paperoan witu eng kota! ¹⁰ Oat o wengi nisea se maledongla eng kota i ti’i witu natas em beton-betonna, wo witu eng goremna em bawean kabelotan wo en cilaka; ¹¹ pakemuan em bitu eng keuneranna, witu em peleinna e reiy’ ma’apu-apu em palotoiyan wo e le’ekok. ¹² Sa si kesaruku si maweleiy niaku, niaku ku torope’ mesa’an nyi’a; sa si rumeri’iris niaku si mangko’la en tou witu niaku, niaku ku torope’ kumirongla en tou witu nisia. ¹³ Ta’an nikoo sitou tawi ampit niaku, ka’ampitku wo tou ka’emanangku: ¹⁴ nikeiy si mewali-wali makasewok ampit e le’os, wo ghumorem em bale ni Empung waki keuneran eng keramean. ¹⁵ Ma’anouw e maut e rumego nisea, ma’anouw sea tumumpa matou-tou witu eng gorem eng kaoatan ne tou minate! Karengan eng kalewo’an em bitu em paena’an nea, yon e witu em batin nea. ¹⁶ Ta’an niaku ku maaleiy wia si Empung, wo si TUHAN si laa lumawirla niaku. ¹⁷ – Witu e nedo mawengindo, memo’odo wo marorake niaku ku kori’ wo maame’; wo Nisia si liminga en suaraku. ¹⁸ Nisia si minayami niaku ampit e aman waki reregoan witu niaku, karengan e mawuyu-wuyut sea mesaru niaku. ¹⁹ Empung si laa luminga wo kumumengla nisea, – Sia si rimuber e rengane’ em purba kala. S e l a (maseng) Karengan nisea se reiy’ maroba wo nisea se reiy’ meide’la si Empung. ²⁰ Sitou i ti’i si minayatla e lawasna wia nisea se matou-tou dame ampit nisia, en ta’arna e linangkoiyna; ²¹ sumana e lebe eree ta’an e mantega, ta’an nisia si mekemaksut mererego; lelila’anna e lebe leme’ ta’an e lana, ta’an em bayana nyi’a mouw en santi sinawut. ²² I sarakanola e lieiymu wia si TUHAN, takar Nisia si laa miara nikoo! Reiy’ i wee eng keure-urena i waya-Nala se tou ulit i ti’i moghe. ²³ Ta’an Nikoo, eeh Empung, si laa rumukila nisea mea witu eng ko’okor em parigi kerarem; sitou tumetoa’ raa’ wo lumele’ekok e reiy’ laa ma’ayo esa nga parua e numurna. Ta’an niaku i yi’i ku ma’eman wia-Nikoo.