¹ Mazmur ni Asaf. Si Kasakuasa, Empung TUHAN, si minee nuwu’ wo kimeret em bumi, waki kinereretikna ni endo i ka’ayo wia eng kine’untepna. ² Waki Sion, en toka kewangunan, Empung si minapaloo’ masena’. ³ Empung ta si meiy wo si reiy’ laa makapenes en tou, witu en sinaru-Na napi e masila’, esa nga kaledong-Na masengo e reghes tumokol kahebat. ⁴ Sia si maaleiy wia si langit waki atas, wo wia si bumi kaa laa ma’adilela se umat-Na: ⁵ “Alinomi wia se tou-tou se i koupus-Kula, se mina’akes teta’aran ampit Niaku timo’otolela witu en tetule rineret!” ⁶ Langit e maabarla eng ka’adilan-Na, karengan si Empung nuesa mouw si Akim. S e l a (maseng) ⁷ “Linganouw, heiy umat-Ku, Niaku ku laa mewewee nuwu’, heiy Israel, Niaku ku laa mesesairi witu nikouw: Niaku mouw si Empung, Empungmu! ⁸ E reiy’ kaa en tetule rineretannu Niaku ku mukum nikoo; reiy’ ku’a re’en en tetule tinunumu e minena-ena’ wawean witu en sinaru-Ku? ⁹ Reiy’ perlu Aku medomi sapi waki walemu ka’apa membe’ raghar waki kaleromu, ¹⁰ karengan se punya-Ku mouw se reiy’ sa mina’asa tekapen en talun, wo se mangariwu-riwu tekapen waki kuntung. ¹¹ Niaku ku sumine’u se reiy’ sa mina’asa wara waki reghe-reghesan, wo sapa se maoghe waki padang nyi’a mouw se witu eng kuasa-Ku. ¹² Sa Aku maarem, reiy’ perlu Kulumila’la wia nikoo, karengan em punya-Ku mouw eng kaoatan wo e reiy’ sa mina’asa em pumpunena. ¹³ Le’ona ni sapi raghar ku’a re’en eng kaaneng-Ku, ka’apa e raa’ ni membe’ raghar ku’a re’en eng koo’ong-Ku? ¹⁴ I sempe mola en syukur tanume en tetule wia si Empung wo wearenouw e nazarmu wia Si Kasarakek! ¹⁵ Maleiy mouw wia-Niaku witu e nedo kase’esekan, Niaku ku laa lumiseiymi nikoo, wo nikoo koo laa mormatla Niaku.” S e l a (maseng) ¹⁶ Ta’an wia se tou fasik Empung si minee nuwu’: “Sapa ku’a re’en e nurusannu mesesoisap eng katataapang-Ku, wo menoto-notor en teta’aran-Ku ampit en sumamu, ¹⁷ e nulitna nikoo mouw si mari’iris en tetogor, wo mesangawekala e nuwu’-Ku? ¹⁸ Sa koo lumoo’ si rongkit, takar nikoo koo maka’ampit ampit nisia, wo makasewok ampit se tou mesa’amek. ¹⁹ Sumamu neiy i wayamula matotorla e lewo’, wo witu e lila’mu eng kimerut e le’ekok wiles. ²⁰ Koo rimuber, wo mengila-ngila’la se patuarimu, masero’ se oki ni ina’mu. ²¹ Ni’itu mouw em patuanannula, ta’an Niaku ku minakapenes en tou; nikoo koo mapokeiyla kaa Niaku i yi’i ku esa nga teper ampit nikoo. Niaku ku laa mukum nikoo wo mali em perkara i yi’i witu en sinarumu. ²² Weeanola ghenang e nyi’i, heiy nikouw si limiurla si Empung; rio te’a Aku ruma’akep, wo e reiy’la si mayami. ²³ Seiy si minapasempela en syukur tanume en tetule, nisia si minormatla Niaku; seiy si jujur e lalanna, eng kelawiran waki si Empung e laa-Ku i papaloo’ola wia nisia.”