¹ Kekantaren. Mazmur ne bani Korah. Wangko’ mouw si TUHAN wo kasa kinalo’oran waki kota ni Empung ta! ² Kuntung-Na eng kudus, e limantouw kewangun, nyi’a mouw eng kelaya-laya’an i wee se minapekasa em bumi; eng kuntung Sion i ti’i, e wa’akat waki esa nga weka amian, eng kota ni Raja Wangko’. ³ Witu em puri-purina Empung si minapasine’ula en tou-Na tanume si benten. ⁴ Karengan e loo’on, se raja-raja se mineiy merur, nisea se mewali-wali makelang memaju; ⁵ demi nisea nu meleloo’ nyi’a, nisea se neiy i kenganga-nganga, neiy i kasenge’, laa o tumingkas minalikoko. ⁶ Kineide’an en timoro nisea maname; nisea se minerara tanu si wewene si laa metetimea’. ⁷ Ampit e reghes sendangan Nikoo koo minete’la eng kapal-kapal Tarsis. ⁸ Tanu e lininga ta mola, tuanakan kangkasi kita lumoo’, waki kota ni TUHAN e minapekasa alam, waki kota ni Empung ta; Empung si minalinto’orla nyi’a i wee eng keure-urena. S e l a (maseng) ⁹ Nikeiy keiy ghimenang, eeh Empung, e nupus lale’-Mu witu eng gorem em bait-Mu. ¹⁰ Tanu e ngaran-Nu, eeh Empung tuanakan eng kewangko’an-Nu mina’ayome waki tempok em bumi; e lawas lele’os-Mu wuta ampit eng ka’adilan. ¹¹ Ma’anouw eng kuntung Sion e mepa’a-pa’ar; ma’anouw se oki-oki’ wewene ne Yehuda merio-rio eng karengan em peukuman-Nu! ¹² Ledongenouw en Sion wo terokenola sia, rekenenouw em pewalena, ¹³ weeanola ghenang em betonna, kelanganola em puri-purina, rio kouw toro sumusuiyla wia se angkatan kamurian: ¹⁴ Eng kaulitna i yi’i mouw si Empung, Empung ta mouw Sia mapawee-weena wo i wee eng keurena! Nisia mouw si ma’aka-aka nikita!