¹ I wee si ma’aka-aka ne biduan. I ki’it e lagu: Wungang bakung. Waki se bani Korah. Kekantaren pawee teturu; kekantaren upus. Nateku sinewel ampit e lelila’an-lelila’an wangun, niaku ku laa ma’ayola en tetabakengku wia si raja; lila’ku nyi’a mouw em pepatik niesa memematik si kasa sigha’. ² Nikoo si kasa wulouw witu e nelet ne oki-oki’ ni tou, kamura’an neiy i katoa’ witu em biwimu, kaa ni’itu si Empung si minerkatola nikoo i wee eng keure-urena. ³ I wa’akesouw en santimu witu e rereenan, heiy pahlawan, witu eng kewangko’annu wo en serengatmu! ⁴ Witu en serengatmu i ti’i maju mouw demi eng kaulitan, eng kenaramen ne tou wo eng ka’adilan! Ma’anouw e lawas lele’osmu en tumuru’la nikoo em pasiwo-siwon – pasiwo-siwon e hebat! ⁵ Oki-oki’ em panamu tarem, e limampat em pusu’ ne kesaru ni raja; bangsa-bangsa se kima’anu witu e wawa’ e ne’amu. ⁶ Reruberannu eng kapunya’an ni Empung, e minena-ena’ i wee e mapawee-weena wo eng keurena, wo e wulu’ eng keraja’annu nyi’a mouw e wulu’ eng kaulitan. ⁷ Nikoo koo meupusla eng ka’adilan wo mari’iris eng kefasikan; kaa ni’itu si Empung, Empungmu, si minisu’ mola nikoo ampit e lana tanume eng kowa’ kepa’aran, limantouwla se ka’ampit-ka’ampit kaesamu. ⁸ E reiy’ sa mina’asa labungmu e mawou mur, gaharu wo en cendana waki istana gading em pepa’ayangen kecapi e mekepa’arenla nikoo; ⁹ witu e nelet nea se i koupusla kina’atoan se putri-putri ni raja, witu esa nga weka lele’osmu rimedeiy si permaisuri limabung e mas waki Ofir. ¹⁰ Linganouw, heiy putri, loo’onouw, wo se’elengola en talingamu, liurenola se bangsamu wo se esa nga pumpun em bale ni ama’mu! ¹¹ Ma’anouw si raja si sumerit karengan eng kawulouwannu, karengan nisia mouw si tuangmu! Mongkotouw wia nisia! ¹² Putri Tirus si mineiy ampit en tetaber-tetaber; tou-tou kaya witu e nelet ne rakyat se laa medo eng gio wia nikoo. ¹³ Kewangunan kasa ni putri raja i ti’i em bitu eng gorem, e labungna makawanaangla mas. ¹⁴ Ampit minake labung sinujian minakeliu-keliur nisia si niali wia si raja; se oki-oki’ reraa se maki’itla nisia, nyi’a i yi’i se ka’ampit-ka’ampitna, se neiy i eiy i wee nisia. ¹⁵ Ampit e mepa’a-pa’ar wo merio-rio sea alin, nisea se ghimorem witu eng gorem e istana ni raja. ¹⁶ Em baya ne ama’ opo’mu satorna se sawelan ne oki-oki’mu ee sangari; nikoo koo laa mopo nisea mamuali pemangko’ wia minapekasa em bumi. ¹⁷ Niaku ku pa’ar mapasine’ula e ngarannu see’ o see’; kaa ni’itu se bangsa-bangsa se laa mee syukur wia nikoo i wee e mapawee-weena wo eng keurena.