¹ I wee si ma’aka-aka ne biduan. Waki se bani Korah. Kekantaren pawee teturu’. Oh Empung, ampit en talinga meiy nuesa e lininga meiy mola, se nene moyang meiy se simusuiy mola wia nikeiy em pasiwo-siwon en tinuana-Mu mola witu en zaman nea, witu en zaman purbakala. ² Nikoo nuesa, ampit e lawas-Mu, simere’ mola se bangsa-bangsa ta’an nisea i yi’i se neiy i waya-Mula matou; suku-suku bangsa se cinilaka-Mu mola, ta’an nisea i yi’i se neiy i waya-Mula sumena. ³ Karengan reiy’ ampit en santi nisea se rimuberla em banua, reiy’ e lalupa nea e maweela nisea kamenangan, ta’an i te e lawas lele’os-Mu wo e lalupa-Mu wo en sena’ eng gio-Mu, karengan Nikoo koo minepa’ar wia nisea. ⁴ Nikoo mouw si Rajaku wo Empungku si minerentala eng kamenangan i wee si Yakub. ⁵ Ampit Nikoo mouw keiy sumunge em baya se kesaru meiy, ampit e ngaran-Nu mouw keiy mele’e-le’ek se tou-tou se timo’or marego nikeiy. ⁶ Karengan reiy’ ampit em panaku aku ma’eman, wo en santiku tu’u e reiy’ minee niaku kamenangan, ⁷ ta’an Nikoo mouw si minee nikeiy eng kamenangan witu em baya ne kesaru meiy, wo se tou-tou se mari’iris nikeiy se wineean-Nu nirang. ⁸ Karengan si Empung nikeiy keiy makantarla em puji-pujian eng kelabotan e nendo, wo i wee e ngaran-Nu keiy tumotorla syukur eng keure-urena. S e l a (maseng) ⁹ Ta’anouw Nikoo koo timea’ mola nikeiy wo minayala nikeiy tena’an e na’abut, Nikoo koo reiy’ minaju mewali-wali ampit em baya ne suraro meiy. ¹⁰ Nikoo koo simiwo nikeiy minunduri waki se kesaru meiy, wo setou-tou se mari’iris nikeiy se maro’obit. ¹¹ Nikoo koo simarakan nikeiy tanume si domba rineretan wo simarakan nikeiy witu e nelet ne bangsa-bangsa. ¹² Nikoo koo minangker se umat-Mu ampit en tuana i te wo reiy’ minedo ka’untungan sapa-sapa waki si mewangker i ti’i. ¹³ Nikoo koo simiwo nikeiy minamuali sering i wee se ketana’-ketana’ meiy, minamuali sesero’an-sesero’an wo pasero’an i wee se tou-tou esa nga kaledong meiy. ¹⁴ Nikoo koo simiwo nikeiy minamuali sesindiren witu nelet ne bangsa-bangsa, kimarenganla se suku-suku bangsa menguyu-nguyung eng kokong. ¹⁵ Kelabotan e nendo niaku ku i pesarula ampit en seringku wo e nirang e minulesela eng gioku, ¹⁶ karengan e lelila’an-lelila’an ne tou se maweleiy wo makewur, witu en sinaru ne kesaru wo ne sumesu’i. ¹⁷ Em baya nyi’a i yi’i en timoro mola nikeiy, ta’an nikeiy keiy reiy’ lumiurla Nikoo, wo reiy’ mase’epangla en teta’aran-Nu. ¹⁸ Nate meiy e reiy’ mesangkal wo eng ke’angan neiy e reiy’ mase’epangi waki lalan-Mu, ¹⁹ ma’anouw tu’u Koo rimimu’umukola nikeiy witu en tampa ne serigala, wo minulesela nikeiy ampit eng karibe’ebengan. ²⁰ Sa wona’ keiy lumiurla e ngaran ni Empung meiy, wo malungla e lawas meiy wia si empung walina, ²¹ ma’anouw tu’u si Empung si reiy’ laa sumoisapla nyi’a? Karengan Nisia si mete’ula em pengiro-ngirong e nate! ²² Eng karengan Nikoo nikeiy keiy witu em bahaya maut kelabotan e nendo, nikeiy keiy i papokeiyla tanume se domba-domba perereretan. ²³ Mawongke mouw! Ka’a Koo tumekel, eeh Tuhan? Tumo’orouw! Te’a mouw metetea’ nikeiy mapawee-wee! ²⁴ Ka’a Koo kumirongla eng gio-Mu wo lumiurla em palotoiyan wo e nubelan witu nikeiy? ²⁵ Karengan e imukur meiy neiy i katenem witu e riawu, e nouwak meiy neiy i kasera witu en tana’. ²⁶ Tumiro’ mouw tumulung nikeiy, i waya momi nikeiy kaa e nupus lale’-Mu!