¹ I wee si ma’aka-aka ne biduan. Kekantaren pawee teturu’ ne bani Korah. Tanu si rusa malelola en so’oso’an e mekerano, tuana mouw si imukurku malelola Nikoo, eeh Empung. ² Imukurku si mare’o wia si Empung, wia si Empung matou-tou, kawisa ku’a re’en aku toro meiy lumoo’ si Empung? ³ E lue’ku minamuali kekaanengku oat o wengi, karengan eng kelabotan e nendo se tou se meila’ wia niaku: “Waki wisa si Empungmu?” ⁴ Nyi’i mouw e laa pegheghenangengku, kasuatan e imukurku en tekur o wedu; kumura aku kumelang maju witu eng keidetan ne tou, rumeriorla nisea kume’ang mea waki wale ni Empung ampit en suara merio-rio wo eng kekantaren syukur, witu eng keramean ne tou-tou se masiwo em pelesir. ⁵ Ka’a koo neiy i keubel, heiy imukurku, wo balisa witu eng gorem en touku? Maarapola wia si Empung! Karengan niaku ku laa mee syukur kasi wia-Nisia, si tumetulungku wo Empungku! ⁶ Imukurku si neiy i kaubel witu en touku, kaa ni’itu niaku ku neiy i kaghenang wia-Nikoo waki tana’ en so’oso’an Yordan wo eng kakuntungan Hermon, waki kuntung Mizar. ⁷ Lawanan wangko’ e mengere-ngeretan ampit e nerutan en tuunan-Nu; e reiy’ sa mina’asa wuaya wo em balolongan-Nu melangkun metawuni niaku. ⁸ TUHAN si minerentala e nupus lale’-Na witu e nendo oat, wo witu e nendo wengi niaku ku mekantarla eng kekantaren, e nesa sombayang wia si Empung patou-touangku. ⁹ Niaku ku limila’ wia si Empung, kuntung watuku: “Ka’a Koo lumiurla niaku? Ka’a aku lewo’ sa reiy’ matou-tou mengasi’ witu wawa’ e ropitan ne kesaru?” ¹⁰ Tanu eng kinuek e maut witu eng gorem e ruiyku se kesaruku se mapero’ niaku, kasuatan meila’ wia niaku eng kelabotan e nendo: “Waki wia si Empungmu?” ¹¹ Ka’a koo neiy i keubel, heiy imukurku, wo ka’a koo balisa witu eng gorem en touku? Maarapola wia si Empung! Karengan niaku ku mee syukur kasi wia-Nisia, si tumetulungku wo Empungku!