¹ I wee si ma’aka-aka ne biduan. Mazmur ni Daud. Niaku ku kasa mengena-ngena’la si TUHAN; laa o sia lumalesi wia niaku wo luminga e rekeiyku makitulung. ² Sia si minopomi niaku waki po’opot eng kapunengan, waki lipetek eng ga’agharan; Sia si timampala ne’aku waki atas eng kentur watu, timataapla eng ke’angku, ³ Sia si mineela eng kekantaren weru witu en sumaku kaa laa melelo’or si Empung ta. Laker tou se laa lumoo’ nyi’a wo se mineide’, laa o ma’eman wia si TUHAN. ⁴ Ma’aruiyola sitou, si minee eng ka’emananna wia si TUHAN, si reiy’ limenge wia se tou-tou tingkeiy, ka’apa wia se tou-tou se sime’epangola witu eng katowoan! ⁵ Lakerouw en tinuana-Mu mola, eeh TUHAN, Empungku, em pasiwo-siwon-Nu e maka’erangen wo e maksut-Mu i wee nikeiy. reiy’la e mete’u i teperela ampit Nikoo! Niaku ku pa’ar ma’abarla wo lumila’la nyi’a, ta’an en taleus wangko’ eng kelakerna kaa laa rekenen. ⁶ Nikoo koo reiy’ mepa’ar wia en tetule rineret wo en tetule sesakeiyan, ta’an Nikoo koo minuka’mola en talingaku; tetule tinunu wo en tetule pare’i en dosa e reiy’ kine’i-Mu. ⁷ Laa o ku lumila’: “Nulit, niaku ku meiy; witu e langkunan eng kaol wawean neiy i kepatik en tanume niaku; ⁸ niaku ku pa’ar tumuanala eng kepa’aran-Nu, eeh Empungku; Taurat-Mu em bitu eng gorem em be’ewerku.” ⁹ Niaku ku maabarla eng ka’adilan witu se jema’ah kewangko’; awes tare e reiy’ petaangengku en sumpingku, Nikoo kangkasi si mete’u, eeh TUHAN. ¹⁰ Ka’adilan e reiy’ mouw i kirongkula witu e nateku, kelale’an-Nu wo eng kelawiran waki-Nikoo en sinusuiykula, nupus-Mu wo eng kaulitan-Nu e reiy’ i peneskula wia se jema’ah kewangko’. ¹¹ Nikoo, TUHAN, te’a mouw metetaang e rahmat-Mu waki niaku, nupus-Mu wo eng kaulitan-Nu satorona en tumayur niaku e reiy’ siena’na! ¹² Karengan eng kacilaka’an eng kimepung niaku i ka’ayo e reiy’ neiy i keila’ eng kelakerna. Niaku ku kinaki’itanouw eng kaselokangku, i ka’ayo ku reiy’ makawoo lumoo’; lebe wangko’ eng kelakerna waki wu’uk witu eng kokongku, i ka’ayo e nateku en timu’utuk. ¹³ Mepa’arla satorona Nikoo, eeh TUHAN, kaa laa mayami niaku; TUHAN, makarenganouw tumulung niaku! ¹⁴ Ma’anouw maka’ato irang wo eng kasa meirang nisea nu waya se mesesawut e nyawaku; ma’anouw sea mundur wo tena’an en sering nisea se mepa’arla eng kacilaka’angku! ¹⁵ Ma’anouw i kapenes karengan e meirang nisea se rimekaki niaku: “Syukur, syukur!” ¹⁶ Ma’anouw melaya-laya’ wo mepa’a-pa’ar kaa Nikoo em baya ne tou se menero Nikoo; ma’anouw nisea se meupusela eng kelawiran waki-Nikoo se minena-ena’ lumila’: “TUHAN i ti’i si wangko’!” ¹⁷ Niaku i yi’i ku peme’itan wo miskin, ta’an si Tuhan si maweela ghenang niaku. Nikoo mouw si timulung niaku wo limiseiymi niaku, eeh Empungku, te’a mouw mangerer!