¹ Mazmur ni Daud witu e nedo minapasempela en tetule i paghenang. TUHAN, te’a mouw me’ukum niaku witu e nupi’-Mu, wo te’a mouw mesesiasa niaku witu eng kepasu’an e nupi’-Mu; ² karengan sioki’na em pana-Mu si limampat niaku, lawas-Mu en timumpa momi timoro niaku. ³ E reiy’la si segaya’ witu e le’onaku eng karengan e nupi-Mu, e reiy’la si lawir witu e ruiy-ruiyku eng karengan en dosaku; ⁴ karengan eng kaselokangku en timoro mola eng kokongku; em baya nyi’a tanu em pemesa’anen wuter e minamuali taleus wuter i wee niaku. ⁵ Em pali’-pali’ku mawou wu’ul, menana’ karengan eng kawe’engelangku; ⁶ niaku ku neiy i kawengku-wengkur, kasa neiy i katu’utuk; kelabotan e nendo niaku ku makelang ampit e mengasi’. ⁷ Karengan e rereenangku wuta em papesin, e reiy’la si segaya’ witu e le’onaku; ⁸ Niaku ku kina’apuan eng keter wo kasa minarimu’umuk, niaku ku mange’enges karengan e meletu-letup em pusu’ku. ⁹ Tuhan, Nikoo si mete’ula e reiy’ sa mina’asa eng kepa’arangku, wo e nga’angalku tu’u e reiy’ neiy i kakirong i wee-Nikoo; ¹⁰ em pusu’ku e menengka-nengkap, eng kaente’angku e limiong, wo en sena’na em berenku tu’u e minere’imi waki niaku. ¹¹ Se kalo-kaloku wo se ka’ampit-ka’ampitku se mina’akat karengan e rumaraku, wo se kawanua patuariku se mina’akat. ¹² Se tou-tou se pa’ar mesesawut e nyawaku se tima’an e we’etes, se tou-tou se mame’inakutla en cilakaku, se maghenangla eng kakemuan wo matiro’la e le’ekok wiles kelabotan e nendo. ¹³ Ta’an niaku i yi’i ku tanu se tou lunteng, niaku ku reiy’ malinga, tanu sitou wowo’ si reiy’ minuka’ en sumana. ¹⁴ yon, niaku i yi’i ku tanu sitou reiy’ malinga, e rereiy’la sipepero witu en sumana. ¹⁵ Karengan wia-Nikoo, eeh TUHAN, niaku maarap; Nikoo mouw si laa mingkot, eeh Tuhan, Empungku. ¹⁶ Eng genangku: “Asal sea reiy’ mepa’a-pa’ar karengan niaku, te’a mewewangko’la en tou witu niaku sakawisa e ne’aku i kaoghe!” ¹⁷ Karengan niaku ku muleiy meka’anu kaa neiy i kasu’usu’, wo niaku ku reiy’ maena-ena’ patoron eng kasa merara; ¹⁸ yon, niaku ku minaku eng kaselokangku, niaku ku kori’ karengan en dosaku. ¹⁹ Se tou-tou se masu’usukla niaku se kasa ka’asa’an, lakerouw se tou-tou se mari’iris niaku e reiy’ sikinapoongan; ²⁰ nisea se masuli e lewo’ wia niaku sawel e le’os, nisea se masu’sukla niaku, karengan niaku ku mekeki’it e le’os. ²¹ Te’a i petetele’ula niaku, ee TUHAN, Empungku, te’a mouw wa’akat waki niaku! ²² Makarenganouw tumulung niaku, eeh Tuhan, kelawirangku!