¹ Waki si Daud. Te’a meupi’ karengan sitou si masiwo e lewo’, te’a loo’ e nate wia se tou masiwo em biles; ² karengan nisea se makarengan kumesut tanu en dukut wo maweles tanu en tanemen-tanemen lisouw. ³ Ma’emanouw wia si TUHAN wo tuananola e le’os, mena’ mola waki wanua minta’ mouw e lale’, ⁴ wo lumaya-laya’ mouw karengan si TUHAN; takar Nisia si laa meela wia nikoo sapa eng kepa’aran e natemu. ⁵ I sarakanola em patou-touannu wia si TUHAN wo ma’emanouw wia-Nisia, wo Nisia si laa minta’; ⁶ Nisia si laa modolela eng kaulitannu tanu en terang, wo eng hakmu tanu e noat ⁷ Makapenesouw en tou witu en sinaru ni TUHAN wo pa’ena’anola Sia; te’a meupi’ karengan sitou si minua’ witu em patou-touanna, karengan sitou si matuanala e le’ekok wiles. ⁸ Mena’ mola meupi’ wo i tele’u mola e nate pasu’ i ti’i, te’a meupi’, ni’itu e mali i te wia eng kalewo’an. ⁹ Karengan se tou-tou se masiwo e lewo’ se laa punengen, ta’an se tou-tou se mengena-ngena’la si TUHAN se laa maka’atola em banua. ¹⁰ Karengan e reiy’ mouw ure kasi, takar mere’i mouw sitou fasik, sa koo meela ghenang en tampana, takar nisia si reiy’ mouw wia kasi. ¹¹ Ta’an se tou-tou kumeng ate se laa maka’atola em banua wo melaya-laya’ karengan eng kasejahtera’an e meloko-lokon. ¹² Tou fasik si matiro’la eng kalewo’an witu sitou ulit wo kimare’eketla em ba’ang witu nisia; ¹³ Tuhan si kime’eke’la sitou fasik i ti’i, karengan Nisia si limoo’ e nendona en tawi mouw. ¹⁴ Tou-tou fasik se simawut en santi wo minengkur em borang nea kaa laa mekekolo’la se tou-tou peme’itan wo se tou-tou miskin, kaa laa mewewunu’ se tou-tou se matou-tou jujur; ¹⁵ ta’an en santi nea e laa kumuek em be’ewer nea nuesa, wo em borang nea e laa repu’un. ¹⁶ Lebe le’os e noki’ wia se tou ulit ta’an e meloko-lokon waki se tou fasik; ¹⁷ karengan e lalupa ne tou-tou fasik e laa repu’unela, ta’an si TUHAN si tumobol se tou-tou ulit. ¹⁸ TUHAN si mete’ula e nendo-nendo ne tou se lale’, wo eng kapunya’an pusaka nea e laa minena-ena’ eng keure-urena; ¹⁹ nisea se reiy’ laa maka’to nirang witu e nedo kacilaka’an, wo nisea se laa mawesu witu e nendo-nendo kelalenan. ²⁰ Eng kaulitna, se tou-tou fasik se laa mapuneng; kesaru ni TUHAN tanu eng kewangunan em padang rukut: nisea se ma’apu mere’i, ma’apu mere’i asarla e nawun. ²¹ Tou fasik se mapinjang wo se reiy’ mawear sumeup, ta’an se tou ulit nyi’a mouw se toroupus wo reiy’ sesel. ²² Eng kaulitna, se tou-tou se binerkat-Nala se laa maka’atola em banua, ta’an se tou-tou se kinutok-Nala se laa re’inla. ²³ TUHAN si tumataapla eng ke’angan-ke’angan ni tou em patou-touanna e mekepa’aren wia-Nisia; ²⁴ sakawisa sia i ka’anu, si reiy’ i ka’ayo i kakoteiy, karengan si TUHAN si timobol e lawasna. ²⁵ Eng ketareanna niaku ku muda, en teakan ku minatu’a mouw, ta’an e reiy’pe’ ma’an mekasa ku lumoo’ sitou ulit neiy i tele’ula, ka’apa se oki’ puyunna se mengiwee-ngiwee roti; ²⁶ susur nendo nisia si mawee en tongkoupusean wo mawee pinjangan, wo se oki’ puyunna se minamuali berkat. ²⁷ Wa’akatenola e lewo’, wo tuananola e le’os, takar nikoo koo laa minena-ena’ minena’ i wee eng keure-urena; ²⁸ karengan si TUHAN si meupusla e nukum, wo Nisia si reiy’ tumele’ula se tou-tou neiy i keupus-Nala. I ka’ayo eng keure-urena nisea se laa kapiara’an, ta’an se oki’ o puyun ne tou-tou fasik se laa re’inla. ²⁹ Tou-tou ulit se laa maka’atola em banua wo mena’ maname mapawee-wee. ³⁰ Suma ne tou ulit e matotorla en sama’, wo e lila’na e meila’la e nukum; ³¹ Taurat ni Empungna em bitu eng gorem e natena, eng ke’angan- ke’anganna e reiy’ maoghe. ³² Tou fasik se mategha’ sitou ulit wo me’inakut mewewunu’ nisia; ³³ TUHAN si reiy’ sumarakan sitou ulit i ti’i witu e lawasna, Sia si reiy’ mayala nisia i papaloo’o-loo’ola fasik witu e nedo paadilen. ³⁴ Pa’ena’anola si TUHAN wo minena-ena’ ki’itenola e lalan-Na, takar Nisia si laa mopo nikoo kaa laa maka’atola em banua, wo nikoo koo laa lumoo’ se tou-tou fasik re’inla. ³⁵ Niaku ku limoo’ siesa tou fasik si gaga tingkeiy, si timou simela tanu e nakana aras Libanon; ³⁶ katoroan niaku nu lumangkoiy, minere’i mouw sia, niaku ku menero nisia, ta’an si reiy’ kina’atoan. ³⁷ Weeanola ghenang se tou le’os ate wo lumoo’o mouw wia se tou jujur, karengan wia se tou se pa’ar en dame se laa wawean e nedo rerior; ³⁸ ta’an se lumelewo’-lumelewo’ se laa punengen mewali-wali, wo e nedo rerior ne tou-tou fasik e laa re’inla. ³⁹ Tou-tou ulit se linawirla ni TUHAN; Nisia nyi’a mouw si tampa paterungan nea witu e nedo kase’esekan; ⁴⁰ TUHAN si tumulung nisea wo lumiseiyi nisea, Sia si limiseiyi nisea waki lawas ne tou-tou fasik wo limawirla nisea, karengan nisea se timerung wia-Nisia.