¹ Waki si Daud. Mapero mouw, TUHAN, sumaru se tou se mepeperoan ampit niaku, sumeke’ mouw sumaru se tou se maseke’ mesaru niaku! ² Tiboiyanouw eng kekelung wo eng kekelung rintek, tumo’orouw tumulung niaku, ³ sawutenouw en tetura’ wo em pati mesesarula se tou-tou se mekeki’it niaku; i lila’ mola wia si imukurku: “Niaku mouw ku kelawirannu!” ⁴ Ma’anouw maka’ato e nirang wo tena’an en sering, se tou-tou se pa’ar mesesawut e nyawaku; ma’anouw mundur wo kasa meira-irang se tou-tou se mesesiwola eng kacilaka’angku! ⁵ Ma’anouw sea tanu e neta niali e reghes, neiy i todo ni Malaikat ni TUHAN; ⁶ ma’anouw e lalan nea e reiydem wo nere, wo si Malaikat ni TUHAN si mekeki’it nisea! ⁷ Karengan e reiy’ ampit sito’otolanna sea tima’an em pure’eket witu niaku, e reiy’ ampit sito’otolanna sea nu kimiar em pemo’opot i wee e nyawaku. ⁸ Ma’anouw eng kapunengan e meiy nisia ampit e reiy’ pengara-ngarapen, em pure’eket neiy i ta’anna, ma’anouw tu sumikop nisia nuesa, ma’anouw sia i ka’anu wo mapuneng! ⁹ Ta’an niaku ku merio-rio eng karengan si TUHAN, niaku ku mepa’a-pa’ar karengan eng kelawiran waki-Niisa; ¹⁰ e reiy’ sa mina’asa ruiyku e meila’: “Yon, TUHAN, seiy ku’a re’en si tanu Nikoo, si rimeta’mi sitou peme’itan waki lawas ni tou lebe ente’ ta’an nisia, se tou peme’itan wo miskin waki lawas ni tou si mekaatla nisia?” ¹¹ Sairi-sairi se kasa pa’ar eng kaketean se timo’or rimedeiy, sapa e reiy’ kete’uangkula, ni’itu mouw em pekeke’in neami waki niaku. ¹² Nisea se simuli’ eng kale’osangku ampit eng kalewo’an; pedaman wiles e rimo’omes niaku. ¹³ Ta’an niaku, eng katoroan nisea nu rara’an, niaku ku minake labung mengasi’; niaku ku simiksa en touku ampit e minoso, wo en sombayangku en simeup limentuti witu em be’ewerku, ¹⁴ tanu mokan si ka’ampiteku ka’apa si patuariku mouw si rara’an, tuana mouw niaku mawinta’; tanu sitou si menga’angal e nga’angal karengan pinatean ni ina’, tuana mouw niaku ku tu’utuk ampit e labung mengasi’. ¹⁵ Ta’an eng katoroan niaku nu neiy i kasu’usu’ i ka’anu, mepa’a-pa’arouw sea wo muyut, minuyut mesaru niaku; se tou-tou wo’oseiy se reiy’ kasine’uangku makewur niaku ampit e reiy’ maena-ena’na; ¹⁶ ampit em fasik nisea se menero-nero’ reiy’ mena’, kimare’eketla em ba’angna witu niaku. ¹⁷ I ka’ayo pira eng keure, Tuhan, Koo matu’us i temi? Lawirenomi si imukurku waki paterian nea, e nyawaku waki se singa-singa muda! ¹⁸ Niaku ku pa’ar mekekantarla en syukur wia-Nikoo witu se jema’ah kewangko’, witu eng keuneran ne rakyat kelaker ku laa melo’o-lo’or Nikoo. ¹⁹ Te’a mouw ma’an mekasa i te mepa’a-pa’ar witu niaku se tou-tou se masu’usukla niaku e reiy’la si kinapoongan, ka’apa memi’ipi-mi’ipitla em beren ne tou-tou se mari’iris niaku e reiy’la si tino’otolan. ²⁰ Karengan nisea se reiy’ mesesusuiyla en dame, wo witu se tou-tou se retuk witu em banua nisea se timiro’la em biles, ²¹ nisea se minuka’ en sumana minakapenar witu niaku wo lumila’: “Syukur, syukur, em beren neiy e limoo’ mola nyi’a!” ²² Nikoo koo limoo’ mola nyi’a, TUHAN, te’a mouw makapenes en tou, eeh Tuhan, te’a mouw wa’akat wia niaku! ²³ Mawongke mouw wo tumo’orouw rumapit eng hakeku, rumapit em perkaraku, eeh Empungku wo Tuhanku! ²⁴ Akimenola niaku minatoroan ampit eng ka’adilan-Nu, eeh TUHAN Empungku, rio te’a sea mepa’a-pa’ar witu niaku! ²⁵ Te’a mouw sea lumila’ witu natena: “Syukur, ni’itu mouw eng kepa’aran neiy!” Wo te’a mouw sea lumila’: “Nikeiy keiy lime’ouw mouw nisia!” ²⁶ Ma’anouw mewali-wali maka’ato nirang wo kasa meirang se tou-tou se mepa’a-pa’ar wiru eng kinabelotangku; ma’anouw mekelabung e nirang wo en sering se tou-tou se minangko’la en touna witu niaku! ²⁷ Ma’anouw merio-rio wo mepa’a-pa’ar se tou-tou se pa’ar lumoo’ niaku i ulitela! Ma’anouw sea minena-ena’ lumila’: “TUHAN i ti’i si wangko’, Nisia si maewela eng kelawiran ne hamba-Na! ²⁸ Wo e lila’ku e laa menoto-notor eng ka’adilan-Nu, melo’o-lo’or Nikoo eng kelabotan e nendo.