¹ Waki si Daud, witu e nedo sia nu towo-towo sepereng eng genangna witu en sinaru ni Abimelekh, i ka’ayo sia neiy i ure’, laa o mea. Niaku ku laa melelo’or si TUHAN witu e reiy’ sa mina’as nedo; puji-pujian wia-Nisia e minena-ena’ witu eng gorem en sumaku. ² Karengan si TUHAN e imukurku e mesawa’; ma’anouw se tou-tou kumeng ate se luminga nyi’a wo mepa’a-pa’ar. ³ Wangko’enola si TUHAN mewali-wali ampit niaku, meiy mouw kita mewali-wali mapasine’ula e ngaran-Na! ⁴ Niaku ku simero mola si TUHAN, laa o Sia mingkot niaku, wo mayami niaku waki e reiy’ sa mina’asa eng keide’angku. ⁵ I tuyu mola en tu’usannu wia-Nisia, takar eng giomu e laa sumena’-sena’, wo reiy’ laa kasa meirang. ⁶ Sitou si neiy i kalotoiy i yi’i si minaleiy, wo si TUHAN si liminga; Sia si limawiri nisia waki e reiy’ sa mina’asa eng kase’esekanna. ⁷ Malaikat ni TUHAN se dimasing waki kaledong ne tou-tou se meide’la Nisia, laa o lumiseiyla nisea. ⁸ Pe’anenouw wo loo’onouw, kumura eng kale’osna si TUHAN i ti’i! Ma’aruiyola se tou se timerung wia-Nisia! ⁹ Meide’ mola si TUHAN, heiy tou-tou-Na kudus, karengan e reiy’ sikakurangan se tou se meide’la Nisia! ¹⁰ Singa-singa muda se timekur kinelalenan, ta’an se tou-tou se masero si TUHAN se reiy’ sikakurangan e wo’o sapa tu’u e le’os. ¹¹ Meiy mouw eeh oki-oki’, linganola niaku, meide’la si TUHAN e laa i turu’kula wia nikoo! ¹² Seiy ku’a re’en sitou si mepa’arla em patou-touan, si maewela e numur pinakatu’an kaa laa mekekeipila e le’os? ¹³ Tayuranouw e lila’mu witu e lewo’ wo en sumpingmu witu en tetororen-tetotoren e mele’ekok; ¹⁴ wa’akatenola e lewo’ wo tuananola e le’os, seronouw em pedamean wo me’inakutouw ma’atola nyi’a! ¹⁵ Em beren ni TUHAN neiy i katuyu wia se tou-tou ulit, wo en talinga-Na witu e rekeiy nea nu makitulung; ¹⁶ eng gio ni TUHAN e mapero se tou-tou masiwo lewo’ kaa laa merere’ila eng genang wia nisea waki saruan em bumi. ¹⁷ Sakawisa se tou-tou ulit i ti’i mengale-ngaleiy, takar si TUHAN si luminga, wo rumeta’mi nisea waki e reiy’ sa mina’asa eng kase’esekan nea. ¹⁸ TUHAN i ti’i si tawi wia se tou-tou se repu’ ate, wo Nisia si limawirla se tou-tou e rimu’umuk imukurna. ¹⁹ Kabelotan ni tou-tou ulit eng kelaker, ta’an si TUHAN si minayami nisia waki em baya nyi’a i ti’i; ²⁰ Sia si kimedirla e reiy’ sa mina’asa e ruiyna, e reiy’ siesa tu’u e minarepu’. ²¹ Kabelotan e laa matela se tou fasik, wo seiy si mari’iris se tou ulit se laa mesa’an e nukuman. ²² TUHAN si minayami e imukur ne hamba-hamba-Na, wo em baya ne tou se timerung wia-Nisia se reiy’ laa mesa’an e nukuman.