1 Rumio-rio mouw, heiy tou-tou ulit, witu si TUHAN! Karengan e melo’o-lo’or i ti’i e waar i wee se tou-tou jujur. 2 Syumukurouw wia si TUHAN ampit eng kecapi, memazmurouw i wee-Nisia ampit eng gambus mapulu’ tali! 3 I kantarola i wee-Nisia eng kekantaren weru; i pa’ayangouw eng kecapi makale’o-le’os ampit e merio-rio! 4 Karengan e nuwu’ ni TUHAN i ti’i e nulit, e reiy’ sa mina’asa wo’o sapa em pina’ayang-Nala ampit eng kelale’an. 5 Nisia si pa’ar eng ka’adilan wo e nukum; em bumi e wuta ampit e nupus o lale’ ni TUHAN. 6 Kaa e nuwu’ ni TUHAN e langit en siniwo mola, kaa e nasengan waki suma-Na e reiy’ sa mina’asa surarona. 7 Sia si minerurla e rano en tasik tanu witu en seper, Sia si minee e lawanan wangko’ witu en tampana. 8 Ma’anouw em pakasa’an em bumi e meide’ wia si TUHAN, ma’anouw em baya ne penduduk eng kaoatan se meide’ witu Nisia! 9 Karengan Nisia si minee nuwu’, takar em baya nyi’a e minamuali; Sia si minee perenta, takar em baya nyi’a em bia. 10 TUHAN si mino’opolela em pesesiwon ne bangsa-bangsa; Sia si rime’ila en tetiro’an ne suku-suku bangsa; 11 ta’an em pesesiwon ni TUHAN en tataap eng keure-urena, tetiro’an e nate-Na see’ o see’. 12 Ma’aruiyola se bangsa, si Empungna nyi’a mouw si TUHAN, suku bangsa se pineleng-Na se minamuali kapunya’an-Na nuesa! 13 TUHAN si matembomi waki sorga, Sia si maloo’mi em baya se oki’ ni tou; 14 waki tampa paena’an-Na Sia si matebomi em baya ne penduduk em bumi. 15 Nisia si minentuk e nate nea nu waya, se mineela ghenang e reiy’ sa mina’asa em pepa’ayangen nea. 16 Siesa raja si reiy’ laa lumawir kaa eng kewangko’an eng kuasa; siesa pahlawan si reiy’ laa katulungan eng kaselana eng kaketeran. 17 Kawalo nyi’a mouw si arapan reiy’ sipenoron kaa laa ma’ayola eng kamenangan, e ma’anouw tu’u tu sela eng kelali’iketanna e reiy’ mete’u mee kaliseiyan. 18 Eng kaulitna, em beren ni TUHAN neiy i katuyu wia nisea se meide’la Nisia, wia nisea se maarapla e nupus lale’-Na, 19 kaa laa mewewayami e imukur nea waki maut wo miara em patou-touan nea witu e noras kelalenan. 20 Imukur ta si mengena-ngena’la si TUHAN, Nisia mouw si tumetulung ta wo kekelung ta! 21 Yon, karengan Nisia e nate ta e mepa’a-pa’ar, karengan witu e ngaran-Na kudus nikita ta ma’eman. 22 E nupus lale’-Mu, eeh TUHAN, satorona e rumapitla nikeiy, tanu nikeiy nu maarap wia-Nikoo