¹ waki si Daud. Kekantaren mawee teturu’. Ma’aruiyola se tou se niampungala eng kaselokanna, en dosana eng kinelungala! ² Ma’aruiyola sitou, eng kaselokanna e reiy’ rinekenla ni TUHAN, wo si reiy’ maka imukur lumele’ekok! ³ Eng keurean niaku nu minakapenes en tou, e ruiy-ruiyku e mina reawa’ karengan niaku kumenga’angal eng kelabotan e nendo; ⁴ karengan oat o wengi e lawas-Mu meubel niaku ampit eng kawuterna, we’enekeku e minapera, tanu kaa en te’etelna e noras ra’ar. S e l a (maseng) ⁵ Dosaku neiy i pakite’ukula wia-Nikoo wo eng kaselokangku e reiy’ mouw neiyku i kirongla; niaku ku limila’: “Niaku ku laa maku wia si TUHAN eng kaselokan-kaselokangku,” wo Nikoo koo minampungla eng kaselokan karengan en dosaku. S e l a (maseng) ⁶ Kaa ni’itu satorona susur tou lale’ se sumombayang wia-Nikoo, kasuatan Nikoo nu toro atonla; eng kaulitna witu e nedo en songker wangko’ minamuali, ni’itu e reiy’ timoro nisia. ⁷ Nikoo mouw si pakirongan i wee niaku, witu eng kase’esekan Nikoo koo makedir niaku, Nikoo koo maledongla niaku, i ka’ayo aku i kaliseiy wo rumio. S e l a (maseng) ⁸ Niaku ku laa mewewee teturu’ wo metetudu’la wia nikoo e lalan e lewo’ sa reiy’ kelangennu; Niaku ku laa mewewee ngenge’enge’, em beren-Ku neiy i katuyu wia nikoo. ⁹ Te’a mouw tanu si kawalo ka’apa bagal se reiy’ siakal, eng kawengi’isanna e lewo’ sa reiy’ patiro’en ampit en tali leis wo en toom, sa reiy’, sia si reiy’ laa tumawila nikoo. ¹⁰ Laker e rumara pineme’itan ne tou fasik, ta’an se tou ma’eman wia si TUHAN se linedong-Nala ampit e nupus o lale’. ¹¹ Mepa’a-pa’arola witu si TUHAN wo rumio-rio mouw, heiy tou-tou ulit; rumio-rio mouw, heiy tou-tou jujur!