¹ I wee si ma’aka-aka ne biduan. Mazmur ni Daud. Wia-Nikoo, TUHAN, niaku materung, te’a mouw ma’an mekasa aku maka’ato irang. I liseiyola aku eng karengan eng ka’adilan-Nu, ² i se’elengomi en talinga-Mu wia niaku, makarenganouw mayami niaku! Mamuali mouw i wee niaku kuntung watu tampa paterungan, reen petaangan kaa laa melelawirla niaku! ³ Karengan Nikoo koo kentur watuku wo petaangangku, wo eng karengan e ngaran-Nu Nikoo koo laa rumawir wo tumeper niaku. ⁴ Nikoo koo laa rumou’mi niaku waki pure’eket neiy i ta’anla ne tou witu niaku, karengan Nikoo mouw si tampa paterungangku. ⁵ Witu e lawas-Mu mouw i sarakankula e nyawaku; Nikoo koo minaya momi niaku, eeh TUHAN, Empung e lale’. ⁶ Nikoo koo mari’iris wia se tou se maepung em berhala e reiy’ sipenoron, ta’an niaku ku ma’eman wia si TUHAN. ⁷ Niaku ku laa merio-rio wo mepa’a-pa’ar karengan e nupus lale’-Mu, karengan Nikoo koo timebo mola em peme’itan, minee mola ghenang eng kase’esekan e imukurku, ⁸ wo reiy’ simarakan niaku witu e lawas ne kesaru, ta’an timaga’la e ne’aku witu en tampa kapelasan. ⁹ I koupusola niaku, eeh TUHAN, karengan niaku ku mapedam se’esek; karengan e rara ate em peme’itanouw em berenku, timekurouw e imukur wo nouwakeku. ¹⁰ Karengan em patou-touangku e mina’apu witu mengasi’ wo en te’un-te’un e numurku witu e nga’angal i penga’angal; kaente’angku eng kimo’okos karengan em peme’itangku, wo e ruiy-ruiyku e minalewea’. ¹¹ Witu en sinaru em baya ne kesaruku niaku ku reiy’ lekep, mekeide’en i wee se ketana-ketana’ku, wo minamuali kasenge’an i wee se kasine’uan-kasine’uangku; nisea se limoo’ niaku waki lalan se timingkasi waki niaku. ¹² Niaku ku neiy mouw i kaliongi waki paghenangan tanu sitou minate, minamuali mouw tanu em barang e minapete’. ¹³ Karengan niaku ku liminga kelaker se tou menena-nena’, – wawean eng kineide’an waki se reiy’ sa mina’asa weteng! – nisea se mewali-wali minaasa’an mececilakala niaku, nisea se mekemaksut mesesawut e nyawaku. ¹⁴ Ta’an niaku, wia-Nikoo aku ma’eman, eeh TUHAN, niaku ku limila: “Nikoo mouw si Empungku!” ¹⁵ E masa patou-touangku e witu lawas-Mu, i waya momi niaku waki lawas ne kesaru-kesaruku wo se tou-tou se mekeki’it niaku! ¹⁶ Siwonouw eng gio-Mu sumena’ witu si hamba-Mu, lawirenola niaku kaa e nupus lale’-Mu! ¹⁷ TUHAN, te’a mouw i pewewayala niaku maka’ato irang, karengan niaku ku maaleiy wia-Nikoo; ma’anouw se tou-tou fasik se maka’ato e nirang wo tumumpa waki kaoatan ne tou minate wo mu’ukul. ¹⁸ Ma’anouw en sumping towo e mu’ukul, e maabut se tou ulit ampit eng katingkeiyan wo en sesero’an! ¹⁹ Kumura eng kalokonena eng kale’osan-Nu e neiy-Mu mouw i kirongla i wee se tou se meide’la Nikoo, en tinuana-Mu mola i wee se tou se timerung wia-Nikoo, witu en sinaru ne tou! ²⁰ Nikoo koo kimirongla nisea witu en sinalangkouwan eng gio-Mu witu em paasa-asa’an ne tou-tou; nikoo koo timerungla nisea witu e lekouw witu em paperoan e lila’. ²¹ Lino’orouw si TUHAN, karengan e nupus o lale’-Na neiy i tudu’-Nala wia niaku ampit e maka’erangen witu e nedo kase’esekan! ²² Niaku ku mapokeiyla witu eng kalikokoangku: “Niaku ku neiy mouw i katea’mi waki sinaru em beren-Nu.” Ta’an eng kaulitna Nikoo koo limingala en suara ni’i paaleiyku, eng katoroan niaku nu marekeiy wia-Nikoo makitulung. ²³ I koupusola si TUHAN, heiy em baya ne tou se neiy i koupus-Nala! TUHAN si timayur se tou-tou se kasa lale’, ta’an se tou-tou se masiwo em biles se sinu’i-Na ampit e reiy’ meware-wareng. ²⁴ Ente’enola wo te’etepenola e natemu, heiy em baya ne tou se maarap wia si TUHAN!